21 кастрычніка, у пятніцу, «Адкрыты лекторый» ладзіць файную анлайн-лекцыю, якая дапаможа вам разабрацца ў штодзённых пытаннечках нацыяналізму, — «Банальны нацыяналізм у Беларусі».
Дата: 21 кастрычніка
Час: 19.00 (час мінскі)
Месца: Zoom
Лектар — Сцяпан Захаркевіч, кандыдат гістарычных навук, дацэнт Дэпартамента гуманітарных навук і мастацтва Еўрапейскага гуманітарнага універсітэта.
Заўсёды ў дыскусіі аб беларускай нацыі ўздымаюцца вострыя пытаннечкі:
Калі яна (беларуская нацыя) узнікла, ці ўзнікла ўжо ўвогуле ?
Ці ключавую ролю ў нацыятворчых працэсах адыгрывае беларуская мова?
Што значыць «быць беларусам»? — то бок пытанне аб ідэнтычнасці ці ідэнтычнасцях беларусаў.
Аднак часцяком тыя пытаннечкі:
дужа абстрактныя (на якія няма прамых і дакладных адказаў нават у самых прызнаных нацыяў);
дужа палітызаваныя — таму адказы ў значнай ступені залежаць ад палітычных пазіцый удзельнікаў дыскусій;
дужа гістарыязаваныя — то бок моцна паглыбленыя ў гісторыю і насычаныя гістарычнымі датамі і асобамі, што ўскладняе разуменне людзям простым і не абазнаным у гісторыі.
У традыцыйным, збольшага вясковым грамадстве, праявай этнічнай культуры беларусаў было амаль усё — адзенне, жыллё, архітэктура, ежа, заняткі, музыка і г.д.
Зараз, у час глабалізацыі і масавай культуры, мы слухаем заходнюю музыку, ездзім на замежных аўтамабілях, носім турэцкае ці кітайскае адзенне па італьянскіх ці французскіх модных канонах, ямо шаўрму, хінкалі, сушы.
Як у гэткай паўсядзённасці людзі з абсалютна зразумелымі і жыццёвымі патрэбам могуць праяўляць сваю нацыянальную ідэнтычнасць?
Праз якія практыкі гэта ажыццяўляецца і што з гэтым рабіць — пра ўсё вы даведаецеся з лекцыі.
Удзел бясплатны!
Рэгіструйцеся па спасылцы і далучайцеся!
