Клуб інтэлектуальнага адпачынку «Факультатыў» запрашае на лекцыю пра беларускае выяўленчае мастацтва ХХ стагоддзя.
Дата: 16 лютага
Час: 19.00
Месца: «Арт-Фабрыка», вул. Свярдлова, 2, Мінск
Марк Шагал, Вітольд Бялыніцкі-Біруля, Міхаіл Савіцкі, Май Данцыг — імёны добра вядомыя і спецыялістам, і не публіцы. Але ў многіх выпадках беларускае мастацтва ХХ стагоддзя — terra incognitа нашай мастацкай культуры.
Вялікая Айчынная вайна, разрабаванне музейных фондаў абумовілі тыя белыя плямы, якія мы ўжо ў ХХI стагоддзі працягваем даследаваць і вывучаць, паступова сціраючы іх з карты нашага мастацтва.
Лекцыя заклікана даць цэласнае ўяўленне пра складанае і супярэчлівае развіццё беларускага мастацтва ў ХХ стагоддзі: ад адкрыцця першых прыватных мастацкіх школ Юдэля Пэна і Янкеля Кругера да творчасці «класікаў нонканфармізму».
Лектарка Кацярына Ізафатава, мастацтвазнаўца, загадчыца аддзела беларускага мастацтва XX–XXI стст. Нацыянальнага мастацкага музея, прадставіць гісторыю беларускага мастацтва ў XX стагоддзі як гісторыю з’яў:
— даведаецеся пра з’яву «Віцебская школа», дзякуючы якой гэты горад стаў авангардным мастацкім цэнтрам, вядомым ва ўсім свеце;
— прыгледзецеся да асаблівасцей творчасці мастакоў з Заходняй Беларусі Язэпа Драздовіча, Пятра Сергіевіча, Міхаіла Сеўрука;
— даведаецеся пра творчасць беларускіх мастакоў-эмігрантаў Мікалая Казака, Мікалая Пашкевіча і інш.;
— прасочыце, як развівалася барацьба такіх рознанакіраваных з’яў, як «авангард» і «рэалізм»; — разбярэце 10 найважнейшых прац ХХ стагоддзя ад «Партрэта Марка Шагала» Юдэля Пэна да «Праекту стагоддзя» Сяргея Войчанкі і Уладзіміра Цэслера.
