Бібліяноч у Мінску
21.04.2023
19:00 - 23:00
бібліятэкі Мінска
Бясплатнае
У пятніцу, 21 красавіка, у мінскіх бібліятэках — Бібліяноч!
Маем некалькі цікавых прапаноў!
Па-першае, завітайце у Цэнтральную навуковую бібліятэку НАН Беларусі. Тут вечар файных лекцый.
У 19.00 пачнецца лекцыя Вадзіма Урублеўскага «Бібліяграфія генеалогіі Беларусі: анонс найбольш важных гкніжных выданняў». У лекцыі адзначаць вехі і постаці, дзякуючы якім масавы чытач атрымаў праз кнігі даступныя каштоўныя звесткі па ўласным радаводзе.
Дата: 21 красавіка
Час: 19.00
Месца: ЦНБ (6 паверх), вул. Сурганава, 15, Мінск
Таксама ў 19.00 плануецца лекцыя антрапалагінь Валянціны Віннікавай і Алены Серанковай «Чалавек скрозь стагоддзі: людзі мінулага, сучаснасці і будучыні».
Прыходзьце даведацца, як змяняліся людзі на працягу апошніх 1000 гадоў. Вы даведаецеся, чым хварэлі людзі Х стагоддзя, а таксама паспрабуеце ўявіць, як будзе выглядаць чалавек будучыні.
Дата: 21 красавіка
Час: 19.00
Месца: ЦНБ (5 паверх), вул. Сурганава, 15, Мінск
Калі вам не цікавыя лекцыі, а 19-й не прапусціце творчы майстар-клас па выцінанцы. Тут навучаць выразаць з паперы дзівосныя ўзоры па традыцыйных тэхніках.
Дата: 21 красавіка
Час: 19.00
Месца: ЦНБ (1 паверх), вул. Сурганава, 15, Мінск
Працягваем лекцыі! У 20.00 гісторык Алег Дзярновіч прачытае лекцыю «Фрэскі Крэўскага замка як феномен мастацкай культуры 14 стагоддзя». Разам з лектарам раскрыеце загадкі фрэсак Княскай вежы, даведаемся, хто іх замаўляў і распісваў. Прыадкрыеце новыя старонкі дынастычнай гісторыі і мастацкай культуры, актуальныя для ўсяго рэгіёна Цэнтральнай і Усходняй Еўропы.
Дата: 21 красавіка
Час: 20.00
Месца: ЦНБ (5 паверх), вул. Сурганава, 15, Мінск
У 21.00 Аляксандр Доўнар чытае лекцыю «Эстэтыка гістарычнай крыніцы».
Ці заўважалі Вы за сабой пачуццё захаплення, калі бачылі старажытныя рукапісы? Элегантнасць ініцыялаў, мастацкае аздабленне рукапісных помнікаў не можа не ўражваць і не выклікаць трапяткіх пачуццяў. Ва ўсёй гэтай прыгажосці зможаце разабрацца на лекцыі спадара Аляксандра.
Дата: 21 красавіка
Час: 21.00
Месца: ЦНБ (6 паверх), вул. Сурганава, 15, Мінск
У 22.00 пачнецца лекцыя Таццяны Даўгач «Эпідэміі доўгага ХІХ стагоддзя».
Эпідэміі суправаджалі чалавецтва на працягу ўсёй яго гісторыі. Яны заўсёды мелі сур’ёзныя наступствы: змянялі звыклы лад жыцця, прымушалі па іншаму паглядзець на пытанні ўласнай гігіены і санітарнага забеспячэння вёсак, гарадоў, або цэлых рэгіёнаў.
Падчас лекцыі пагавораць пра эпідэміі так званага «доўгага ХІХ стагоддзя» і той сацыяльны эфект, які яны мелі для беларускіх земляў.
Дата: 21 красавіка
Час: 22.00
Месца: ЦНБ (6 паверх), вул. Сурганава, 15, Мінск
Таксама праз увесь вечар будзе працаваць археалагічна-антрапалагічная выстава «Скура ды косткі», дзе можна пабачыць археалагічныя артэфакты і пагутарыць з археолагамі і антраполагамі Інстытута гісторыі НАН Беларусі.
У чытальнай зале рэдкіх кніг і рукапісаў тым часам можна будзе здзейсніць «Падарожжа па старонках мінулага»: ад «Нюрнбергскай хронікі» Хартмана Шэдэля (1493) да літаратурных прыгод першай чвэрці ХХ стагоддзя!
З чаго пачаць генеалагічнае расследаванне, па якіх падручніках вучыліся дзеці з княскага роду Радзівілаў, хто вынайшаў шматступенную ракету ў далёкім XVII стагоддзі? Усё даведаецеся тут ды пабачыце мноства цікавых рэдкіх кніг.
А запрошаныя з універсітэта культуры артысты дадуць трошкі музыкі, каб ажывіць навуковы вечар. Уваход, вядома, вольны!
У бібліятэцы імя Янкі Купалы, што на вул. Харужай, вось якія крутыя імпрэзы:
Па-першае, майстар-клас Валерыі Уладамірскай па саломапляценні, дзе вы навучыцеся плесці з саломкі прыгажосць ды створыце сабе невялічкі абярэг.
Дата: 21 красавіка
Час: 20.00
Месца: бібліятэка імя Янкі Купалы, вул. Харужай, 16, Мінск
Па-другое, прэзентацыя кнігі Алены Мікульчык «Смак беларускай гісторыі» і ду-у-у-ужа смачны кулінарны майстар-клас паводле кнігі.
Дата: 21 красавіка
Час: 21.15
Месца: бібліятэка імя Янкі Купалы, вул. Харужай, 16, Мінск
Тым часам у Нацыянальнай бібліятэцы будзе акцыя «БібліяІмпульс».
Абяцаюць:
квесты ад кампаніі «Квесторыя»,
шахматна-шашачныя турніры,
«настолкі» ад Hobby World, этнавечарыну з фолк-гуртом Guda і капэлай традыцыйнай музыкі «Анягож»,
чайны рытуал «Тры кубкі тэксту»,
лекцыі адваката, астрапсіхолага, астролага, нутрыцыёлага, імідж-стыліста, майстар-класы па фантастычнай ілюстрацыі, сучасных бальных танцах, індыйскім танцы і многае іншае.
Для дзетак будуць майстар-класы і ўзорны тэатр лялек «Васілёк» ад ЦДАДіМ «АРТ», арт-тэатр Vershina, цыркавая студыя Fantasy, творчыя сустрэчы з дзіцячым пісьменнікам Аленай Масла і пазнавальная IT-праграма ад вучэбнага цэнтра «Айціландыя».
Уваход вольны.
Дата: 21 красавіка
Час: з 19.00
Месца: Нацыянальная бібліятэка, пр-т Незалежнасці, 116, Мінск
