27 студзеня а 15-й гадзіне адбудзецца прэзентацыя сумеснага сацыякультурнага праекта Міністэрства культуры, Міністэрства гандлю, Мінскага гарадскога выканаўчага камітэта і Нацыянальнага мастацкага музея Рэспублікі Беларусь «Мінск вачыма мастакоў», прысвечанага 950-годдзю горада Мінска.
Горад – гэта яго жыхары, іх домы, прахалоднае метро, павольныя аўтобусы, гучныя машыны, маўклівыя паркі, вузкія вулачкі і шырокія праспекты. Вобраз горада ў кожнага свой. Мы ж пакажам Мінск вачыма захавальнікаў часу – вачыма мастакоў. Праект у лаканічнай форме распавядае пра Мінск XX стагоддзя. Родныя, але яшчэ зусім не абжытыя вуліцы, малады Зялёны Луг, старадаўняя Няміга і іншыя дзіўныя месцы нашага горада – усё гэта мы зможам убачыць на працягу года на вуліцах сталіцы. Немалаважным з’яўляецца тое, што многія з выкарыстаных у праекце работ немагчыма ўбачыць у сённяшняй экспазіцыі Нацыянальнага мастацкага музея Рэспублікі Беларусь.
Праект «Мінск вачыма мастакоў» – гэта ўдалы прыклад супрацоўніцтва горада і музея, які даказвае, што мастацтва не мае межаў. Вядома, далёка не ўсе палатны пра горад увайшлі ў праект, але многія са знакамітных работ чакаюць гледача ў выставачных залах. Для гасцей прэзентацыі будзе арганізавана ўнікальная экскурсія, якая пазнаёміць з работамі, дзе адлюстраваны куткі горада Мінска ў розныя гістарычныя перыяды.
Праект «Мінск вачыма мастакоў» разлічаны на ўвесь 2017 год і адкрывае шэраг буйных культурных мерапрыемстваў і акцый, прысвечаных юбілею горада Мінска.
