Францыск Скарына і наш час

7 красавіка а 16-й гадзіне 2016 г. у Музеі кнігі Нацыянальнай бібліятэкі Беларусі адкрыецца нечаканая выстава, прысвечаная вельмі чаканаму юбілею «Францыск Скарына і наш час».

Беларускі першадрукар і асветнік Францыск Скарына з’яўляецца знакавай постаццю нацыянальнага маштабу. Але на выставе будзе прадстаўлена не гэта традыцыйна ўзнёслае ўспрыняцце «волата эпохі Адраджэння». Пачынальнік беларускага кнігадрукавання паўстане як наш сучаснік. Падчас выставы ўпершыню прастора Музея кнігі будзе занятай не кнігамі. Наведвальнік атрымае магчымасць акунуцца ў сучасны свет успрымання сімвалаў і вобразаў беларускага першадрукара, адшукаць яго пазнакі ў прадметах побыту, у школьных аксесуарах, у студэнцкай і ўвогуле маладзёжнай субкультуры, у асяродку навукоўцаў і калекцыянераў, карпаратыўнай атрыбутыцы, у мастацкім ўвасабленні тэатра і кіно.

Наведвальнікаў чакаюць гульні і забавы, а таксама іншыя прыемныя нечаканасці.

Экспануюцца матэрыялы са збораў Нацыянальнай бібліятэкі Беларусі, Нацыянальнага гістарычнага музея Рэспублікі Беларусь (філіял «Музей гісторыі тэатральнай і музычнай культуры», філіял «Музей гісторыі беларускага кіно»), Нацыянальнага Полацкага гісторыка-культурнага музея-запаведніка, Гомельскага дзяржаўнага ўніверсітэта імя Ф. Скарыны, гімназіі №1 імя Ф. Скарыны г. Мінска, Полацкай дзяржаўнай гімназіі імя Ф. Скарыны, кавярні «У Францыска», прыватных калекцыянераў.

Куратар выставы – Алесь Суша, намеснік дырэктара Нацыянальнай бібліятэкі.
Выстава рэалізавана пры падтрымцы генеральнага партнёра праекта – кампанii МТС.

Адкрыццё выставы адбудзецца 7 красавіка 2016 г. а 16 гадзіне ў Музеі кнігі Нацыянальнай бібліятэкі Беларусі (пр. Незалежнасці, 116, 3-ці паверх).
Выстава будзе працаваць з 7 красавіка да 7 чэрвеня 2016 г.

Прыходзьце. Будзе цікава!
Уваход вольны!