Фестываль дзіцячай кнігі ў Маладзечне
Пачатак: 05.09 (11:00)Канец: 05.09 (14:00)
Маладзечна, парк Перамогі
Фестываль дзіцячай кнігі «Я чытаю. Ты чытаеш. Мы Чытаем» адбудзецца ў Маладзечне ў парку Перамогі з 11.00 да 14.00. У праграме свята – гульні, конкурсы, віктарыны, інтэрактыўныя выставы і майстар-клас.
Арганізуе мерапрыемства Цэнтральная раённая бібліятэка імя Багдановіча. У фестывалі таксама возьмуць удзел тэатр лялек «Батлейка», Палац культуры ў Маладзечне, Дзіцячы Цэнтр культуры «Расток» і тэатральная студыя «Казка» Цэнтра творчасці дзяцей і моладзі «Маладзік».
Як распавяла Край.бай загадчыца аддзела абслугоўвання і інфармацыі бібліятэкі Таццяна Закрэўская, фестываль дзіцячай кнігі ў Маладзечне пройдзе ўпершыню. Яго прымеркавалі да Дня беларускага пісьменства.
Па словах суразмоўніцы, свята разгорнецца на пяці пляцоўках, галоўная з якіх будзе знаходзіцца побач з гарадскім амфітэатрам.
– У праграме фестывалю запланаваны конкурсна-забаўляльныя праграмы, інтэрактыўныя выставы, віктарыны, майстар-клас па стварэнні кніжных закладак і сустрэчы з дзіцячымі пісьменнікамі. Спіс апошніх пакуль ўдакладняецца, свой удзел ужо пацвердзілі некалькі аўтараў. Пераможцаў, – адзначыла Таццяна Закрэўская, – чакаюць заахвочвальныя прызы.
Па меркаванні загадчыцы аддзелам, на свяце будзе цікава і дашколятам, і школьнікам да 9 класа.
– Фестываль разлічаны на дзяцей рознага ўзросту. Думаю, – дадала яна, – цікава будзе тым, хто любіць і хоча чытаць.
Пачатак фэсту ў 11.00. Уваход вольны.
