Майстар-клас па відзіках на лецішчы Быкава ў Ждановічах (6+)

20 чэрвеня, у суботу, у музеі-дачы Васіля Быкава ў Ждановічах адбудзецца майстар-клас Ірыны Князевай па відзіках.

«Відзікі» — гэта від народнага дэкаратыўнага роспісу, распаўсюджаны ў Беларусі з канца XIX стагоддзя да 1980-х гадоў, карціны напісаныя фарбай на шкле.

Разам з маляванымі дыванамі, вышытымі ручнікамі і тканымі посцілкамі, «відзікі» фарміравалі цэласны ансамбль пасляваеннага вясковага інтэр’ера.

Абразы, рамкі для фотаздымкаў, інтэр’ерныя карціны розных жанраў з выявамі букетаў кветак, птушак, катоў, жанчын, закаханых пар або копіі сюжэтаў вядомых карцін адлюстроўвалі ўяўленні аб прыгажосці і гармоніі жыхароў беларускіх вёсак.

Асаблівасцю «відзікаў» з’яўляецца выкарыстанне фольгі як ніжняга слою — яна прыгожа ззяе праз яркія фарбы і цёмны фон, надаючы карцінам незвычайнае «святло знутры».

У 2023 годзе «відзікі» былі ўключаны ў спіс нематэрыяльных культурных каштоўнасцей Беларусі. Сёння яны зноў набываюць папулярнасць як аўтэнтычная форма беларускага інсітнага мастацтва.

Падчас майстар-класа ўдзельнікі пазнаёмяцца з традыцыяй і ўзорамі «відзікаў», пакрокава авалодаюць тэхнікай роспісу па шкле, створаць уласны аўтарскі «відзік» пад кіраўніцтвам мастачкі.

Удзел — 25 рублёў (рамка са шклом А4, акрылавыя фарбы, пэндзлі, маркеры, трафарэты, фартухі, нарукаўнікі, сурвэткі і інш. уваходзяць у кошт).

Запісвайцеся па нумары +375 29 811 21 85.