Сустрэча «Метафізіка канону: Янка Купала, Якуб Колас і Максім Багдановіч» у Мінску
12.02.2025
19:00 - 21:00
музей Максіма Багдановіча (вул. Багдановіча, 7а)
5 рублёў
У сераду, 12 лютага, у музеі Максіма Багдановіча адбудзецца новая сустрэча ЛабаРАторыі паэтычнай метафізікі з Ігарам Бабковым.
Нагадаем, гэта цыкл сустрэч, прысвечаных беларускай (і сусветнай) традыцыі інтэлектуальнай літаратуры / метафізічнай паэзіі.
Па форме выступае як conversatorium, літаратурна-філасофская майстроўня, у якой адбываецца сумесная работа па адмыканні сэнсаў, схаваных пад абалонкай літаратурных твораў.
Тэма новай сустрэчы — «Метафізіка канону: Янка Купала, Якуб Колас і Максім Багдановіча».
Прадметам разгляду і інтэрпрэтацыі стане паэтычная спадчына беларускіх класікаў у вытлумачэннях Алеся Разанава:
«Калі мы гаворым, што Колас гэта зямля і зямное, родны кут, асалода ад блізкіх і ўтульных рэчаў, што спадарожнічаюць нам у нашым падарожжы, мы патрапляем у ягоную метафізіку.
Калі мы працягваем, што Купала гэта беларускае неба, трывожнае і высокае, у чымсьці бязлітаснае да чалавечых лёсаў, мы відавочна выходзім за межы ягонай паэтыкі і ягонай паэзіі. І патрапляем у метафізіку.
Калі мы цвердзім, што Багдановіч дэміург формы, а Ластоўскі алхімік традыцыі, што яны навучылі толькі паўсталую культуру, цяжарную новым зместам, шукаць і выбіраць сваё, не разменіваючыся на часовыя праўды і паспалітыя сцежкі, мы патрапляем у метафізіку».
Для разгляду прапануюцца эсэ: «Жыта і васілёк. Слова пра Максіма Багдановіча», «Нататкі на дубовых лістах» (Якуб Колас), «Што я мужык, усе тут знаюць...» (Янка Купала).
Мадэратар — Ігар Бабкоў, вядучы навуковы супрацоўнік Інстытута філасофіі НАН Беларусі, кандыдат філасофскіх навук, дацэнт.
Квіткі — 5 рублёў.
