Творчая сустрэча з паэтам і сцэнарыстам Уладзімірам Марозам
Пачатак: 16.10 (17:00)Канец: 16.10 (19:00)
Дзяржаўны літаратурна-мемарыяльны музей Якуба Коласа
16 кастрычніка а 17 гадзіне ў Дзяржаўным літаратурна-мемарыяльным музеі Якуба Коласа адбудзецца творчая сустрэча з паэтам і сцэнарыстам Уладзімірам Марозам.
Уладзімір Вікенцьевіч – ураджэнец горада Косава Івацэвіцкага раёна Брэсцкай вобласці. Скончыў архітэктурны факультэт БПІ (1975), літаратурны інстытут імя А.М.Горкага ў Маскве (1983). Працаваў старшым рэдактарам Дзяржкіно БССР, вядучым рэдактарам студыі «Летапіс» кінастудыі «Беларусьфільм» (1988-1998), намеснікам галоўнага рэдактара часопіса «Бярозка» (1998-2004). З 2005 года – вядучы рэдактар дакументальнага кіно Нацыянальнай кінастудыі «Беларусьфільм».
Шмат якія фільмы адзначаны прызамі і ўзнагародамі міжнародных кінафестываляў. Фільм «Успамін пра Міколу Равенскага» у ліку трох фільмаў рэжысёра Міхаіла Жданоўскага адзначаны Дзяржаўнай прэміяй Рэспублікі Беларусь.
Уладзімір Мароз – аўтар паэтычных зборнікаў «Пяшчотны дотык», «Голас», «Рэй», «Хутаранская зорка», «Дабрадаць», кніг прозы і эсэ «Беларускі храм», «Мінск старадаўні і малады” (4 выданні), «Мінск. Верхні горад», «Мінск. Плошча Перамогі», «За брамай забытых мелодый», «Магілёў» і іншых.
У доме Якуба Коласа 16 кастрычніка будзе прадстаўлена новая кніга паэзіі Уладзіміра Мароза “Шляхцянка-восень”, а таксама адбудзецца прэм’ера дакументальнага фільма “У пошуках новай зямлі”, створанага кінастудыяй “Беларусьфільм” да 130 года з дня нараджэння народнага паэта Беларусі Якуба Коласа.
У сустрэчы прымуць удзел слынныя беларускія літаратары: пісьменнік і журналіст, Лаўрэат Дзяржаўнай прэміі БССР імя Якуба Коласа Віктар Казько, паэт і празаік Леанід Дранько-Майсюк, пісьменнік, паэт і драматург Уладзімір Ягоўдзік, а таксама кінарэжысёры Мікалай Князеў і Яўген Сяцько.
Пачатак у 17.00.
Наш адрас: г. Мінск, вул. Акадэмічная, 5. Тэл. 284 17 02
