З 7 траўня ў музеі народнай архітэктуры і побыту ў Азярцы, што пад Мінскам, працуе выстава «Ганчарны посуд Беларусі».
Дата: з 7 траўня
Месца: музей народнай архітэктуры і побыту, Азярцо, Мінскі раён
На часовай экспазіцыі — традыцыйныя гліняныя вырабы з усёй краіны, а таксама прылады працы ганчароў (усяго 99 экспанатаў). Кожны з шасці раздзелаў выставы знаёміць наведвальнікаў з ганчарствам пэўнага гістарычна-этнаграфічнага рэгіёна Беларусі.
Вы даведаецеся пра розныя ганчарныя асяродкі, тыпы посуду, спосабы яго фармоўкі, апрацоўкі, дэкаравання. Белагліняныя вырабы з Гарадной, чорнаглянцаваная кераміка з Пружан і Поразава, абварная з Ганявіч і Сіняўкі, паліваны посуд з Івянца і Ракава, шматлікія экспанаты з іншых цэнтраў ганчарства дазволяць у думках перанесціся на малую радзіму ў хату продкаў.
Вас чакаюць:
куратарская экскурсія па выставе;
прэзентацыя каталога выставы;
майстар-класы ад ганчароў.
