У грузінскім Батумі 11 студзеня адбылася першая сустрэча сямейнага беларускага клуба. Арганізавала клуб Кася Панкевіч, якая ўжо некалькі месяцаў праводзіць заняткі гуртка беларускай мовы для дзяцей.
Са з’яўленнем клуба магчымасць далучыцца да беларускамоўнага асяродку ў Батумі атрымаюць не толькі дзеці, але і дарослыя.
На першую, арганізацыйную сустрэчу сабралася каля 30 чалавек — дзяцей і дарослых.
Плануецца, што ў межах клуба будуць працягвацца заняткі па беларускай мове для дзяцей. Паколькі прыйшло шмат дзяцей малодшага ўзросту, заняткі будуць арганізаваныя паралельна ў дзвюх групах: для дзетак 3-5 год і для старэйшых за 6 год. Пасля заняткаў дзеці змогуць разам бавіць час у вольным фармаце: пагуляць у настолкі, памаляваць, пачытаць, ляпіць з цеста, і, канешне, гуляць у актыўныя гульні.
«Нас шмат, мы троху пазнаёміліся. Мы плануем заняткі для дзяцей асобна, і яны будуць складацца з розных частак. Будзе знаёмства з нейкай тэмай, на розны ўзровень, для малодшых робіцца нешта прасцей, старэйшым я стараюся падбіраць нейкія цікавосткі, якія яны не ведаюць. Гэта заўсёды можна знайсці. Нават для беларускамоўных сем’яў, дзе дзеці дасведчаныя, усё роўны можна знайсці для іх штосьці новенькае і распавесці», — распавядае Кася Панкевіч.
Дарослыя ў межах клуба маюць выдатную пляцоўку для камунікацыі з землякамі. Падчас сустрэч можна будзе проста пагутарыць, гуляць у настолкі, развучваць беларускія песні і танцы, праводзіць беларускія святы. Таксама можна праводзіць інфармацыйна-адукацыйныя сустрэчы на тэму беларускай мовы, гісторыі, культуры. У лютым арганізатары клуба плануюць праводзіць беларускія квізы для дзяцей і дарослых.
«Ідэя ў тым, каб у нас быў менавіта сямейны клуб, каб і бацькі маглі ў гэты час чымсьці пазаймацца. Чым дакладна займацца, можна вырашыць супольна», — гаворыць Кася Панкевіч.
Падчас першай сустрэчы ўсе ўдзельнікі знаёміліся адзін з адным у гульнявой форме, каб цікава было не толькі дарослым, але і дзеткам.
Таксама адбыўся невялічкі майстар-клас па беларускіх народных танцах ад спадарыні Антаніны Маламы. Яна прыехала ў Батумі па запрашэнні знаёмай.
«Я прыехала сюды перазімаваць. Як я кажу, «у вырай». Танцамі я займаюся не прафесійна, і людзі здзіўляюца, што я пайшла на пенсію і пайшла танцаваць, але мне пашчасціла, я трапіла ў рукі да выбітнага этнахарэографа Мікола Козенкі, — распавядае спадарыня Антаніна. — Гадоў 8, мабыць, займаюся. Выступалі, я была ў гурце «Гуда» адзін час. Мы ездзілі выступаць з гуртом, у фестывалях удзельнічала, нават і прызавыя месцы займалі».
Калі будуць запрашаць, спадарыня Антаніна гатовая і далей праводзіць заняткі па беларускіх танцах у Батумі: «Адзін майстар-клас ужо быў. Калі мы рахтаваліся да Калядак, сустракаліся. Нам так спадабалася. І людзі хацелі б збірацца і далей. Калі людзі захочуць, то я ахвотна буду паказваць».
З малымі дзецьмі, калі яны раптам не захочуць баць на занятку гуртка, будзе займацца спадарыня Ірына. Яна па адукацыі юрыст і не працавала ў сферы адукацыі, але выдатна ладзіць з дзецьмі, што было добра заўважна ўжо з першай сустрэчы.
«У Грузіі нам цяжка з нашым менталітэтам і не хапае камунікацыі з беларусамі. Добра, што з’яўляюцца такія ініцыятывы, — гаворыць Ірына. — Так склалася, што ў Беларусі ў мяне 8 хрэснікаў, і таму я сябрую з дзецьмі. У мяне мама — настаўніца, я так прывыкла, што дзеці заўсёды былі ў маім жыцці».
Ужо зараз у беларускім клубе створана невялікая бібліятэка беларускамоўных дзіцячых кніг. Іх можна пачытаць на месцы або ўзяць з сабой за сімвалічную плату ці ўзамен пакінуць сваю кнігу. А ў бліжэйшай будучыні плануецца таксама стварэнне бібліятэчкі беларускіх кніг і часопісаў для дарослых.
Сустрэчы клуба будуць праходзіць двойчы на тыдзень (па аўторках і чацвяргах) з 18 да 20-ці гадзін.
Для запісу на заняткі і за падрабязнай інфармацыяй можна звяртацца ў суполку «Беларускі клуб у Батумі» ў тэлеграме.
ТП, budzma.org
