Больш за год спрабуюць прадаць гродзенскую сядзібу апошняга караля Рэчы Паспалітай Станіслава Аўгуста Панятоўскага. Цана паступова падае, але пакупнікі пакуль не знаходзяцца, піша reform.news.

Упершыню сядзібу выставілі на аўкцыён у красавіку 2023 года — тады стартавая сума лота склала 374 тыс. рублёў. Наступным разам — у ліпені 2024 года за 351 тыс. рублёў.

Кошт былога палаца Панятоўскага ў Панямуні знізілі да 70,2 тыс. руб. ($ 21 тыс.) без ПДВ. За такі кошт у Гродне зараз цяжка знайсці нават старую «аднушку», піша Hrodna.life.

Будынак афіцыйна празначаны для спецыялізаваных культурна-асветніцкіх імпрэз і відовішч. Зараз будынак належыць ТАА «Гроднапрамтэхніка», а ў савецкі час тут быў клуб.

Палац, размешчаны на вуліцы Прагулачнай 15/1, з’яўляецца гісторыка-культурнай каштоўнасцю. Пакупнік мусіць падпісаць ахоўнае абавязацельства цягам месяца пасля продажу. Калі ён не выканае ўмоў аўкцыёну, дзяржава зможа канфіскаваць маёмасць.

Аўкцыён пройдзе 12 лістапада.

Раім паглядзець: Ён пахаваў Рэч Паспалітую? Праўда і міфы пра апошняга караля

Летні палац караля Рэчы Паспалітай Панятоўскагаў Панямуні пабудаваў у 1771 годзе ў стылі позняга барока італьянскі архітэктар Джузэпэ Сака. Там месцілася загарадная рэзідэнцыя апошняга караля Рэчы Паспалітай Станіслава Аўгуста Панятоўскага. У XIX стагоддзі належаў Друцкім-Любецкім, пазней Ляхніцкім. Пасля 1945 года ў памяшканнях доўгі час знаходзіўся клуб мясцовай «Сельгастэхнікі». Там былі кіназала і бібліятэка.

Сядзіба ў Панямуні ў Першую сусветную вайну.
Фота з калекцыі Фелікса Варашыльскага, commons.wikimedia.com

Палац некалі быў каменным, але ад яго захаваўся толькі фрагмент кутнай вежы. Разбураныя каменныя сцены былі пазней адбудаваны з дрэва.

Першапачатковы выгляд палаца невядомы. Да нашых часоў дайшлі больш познія яго выявы канца ХІХ стагоддзя на малюнках Напалеона Орды і шматлікіх фотаздымках.