Галоўчанка анонсаваў маштабныя раскопкі на гарадзішчы «Менка» наступным летам. Да іх могуць далучыць студэнтаў гістарычных факультэтаў, перадае БЕЛТА.
У дзень святкавання 955-годдзя Мінска прэм’ер-міністр наведаў археалагічныя раскопкі на месцы старажытнага Мінскага замка.
«Мы сёння сюды прыехалі для таго, каб абмеркаваць пытанне, як можна ўдыхнуць жыццё ў гэты ўнікальны аб’ект. Як адзначылі гісторыі, ён значны па маштабнасці не толькі для Беларусі, але і для ўсёй Усходняй Еўропы. Наш недагляд, што яго развіццю дзяржава не надавала належнага значэння. Мы ўпершыню гэтае пытанне ўзнялі, калі сустракаліся ў Інстытуце гісторыі. Сёння ж намецілі першачарговыя дзеянні, якія неабходна зрабіць, каб надаць патрэбную дынаміку развіццю помніка», — сказаў Раман Галоўчанка.
Па яго словах, калі будзе дадзена навуковае абгрунтаванне, катэгорыю помніка павысяць як мінімум да другой, то бок помніка рэспубліканскага значэння. «Гэта дасць пэўныя паўнамоцтвы, каб яго адпаведным чынам развіваць, — звярнуў увагу прэм’ер-міністр. — У гісторыкаў існуе кансенсус, што гэтае гарадское паселенне больш старажытнае, чым тое, што з'явілася на Няміге. Таксама ёсць гіпотэзы, што яны існавалі паралельна. Насамрэч гэта не так істотна, таму што, без уліку таго, ці было гэтае гарадзішча папярэднікам сучаснага Мінска, ці не, гэта, безумоўна, значны помнік. Гэта яшчэ адно сведчанне таго, што беларуская дзяржаўнасць не прыдуманая, не кімсьці прыўнесеная, а спрадвечна наша».
Як адзначыў Раман Галоўчанка, у наступным годзе ўзмоцняць навуковае вывучэнне памятніка з пункту гледжання археалагічных раскопак. «Ёсць прапанова, каб студэнты ўсіх гістарычных факультэтаў (у краіне іх 16) наступным летам былі прыцягнутыя сюды для ажыццяўлення маштабных раскопак, якія намецілі спецыялісты-археолагі, — падкрэсліў прэм’ер-міністр. — Таксама паралельна будзем займацца пытаннямі стварэння тут гісторыка-археалагічнага комплексу. Канцэпцыя яго развіцця павінна быць створана на аснове навуковых рэкамендацый. Сёння мы пра гэта прынцыпова дамовіліся, і хутка, я спадзяюся, прымем афіцыйнае рашэнне».
Фота Максіма Гучака
Па тэме:
