Калі вы раптам яшчэ не вызначыліся, як цікава адсвяткаваць Каляды, мы падкажам. Калядныя сустрэчы ды майстар-класы, святочныя экскурсіі ды батлейкі, калядныя спектаклі і кірмашы, канцэрты беларускіх музыкаў — выбірайце мерапрыемствы ў сваім горадзе і на свой густ!

Беларусь, Мінск і Мінская вобласць

Імпрэза «Прыйшла Каляда!» у Мінску

22 снежня, у панядзелак, у музеі Якуба Коласа адбудзецца імпрэза «Прыйшла Каляда!».

Калядоўшчыкі штогод апранаюцца ў яркія касцюмы, часта ўпрыгожваючыся маскамі. Яны ходзяць па дамах, спяваюць калядкі — песні, якія расказваюць пра зіму, Каляды і пра добрыя справы.

Прыходзячы ў хату, калядоўшчыкі не толькі весяляць гаспадароў, але і прыносяць з сабой поспех і дабрабыт. Гаспадары частуюць іх прысмакамі, пірагамі і іншымі пачастункамі, а часам і дораць невялікія падарункі.

З дапамогай фальклорнага ансамбля «Млынок» дзеці пазнаёмяцца з традыцыйнымі віншаваннямі калядоўшчыкаў, абрадам «Ваджэнне казы», прымуць удзел у калядных гульнях.

Вялікае княства Сула

24 снежня і 6 студзеня ў комплексе «Вялікае княства Сула» Каляды прапануюць перажыць у фармаце тэматычнай вячэры «Калядная спадчына Беларусі». Падчас свята госці не проста назіраюць, а становяцца часткай абрадаў — у тым ліку «Калядных цароў» і «Пячы ката».

Для гасцей рыхтуюць святочную вячэру з традыцыйных страў, якія ў беларускай культуры звычайна гатавалі толькі раз на год — падчас калядных тыдняў.

У Суле Каляды існуюць пераважна ў фармаце турыстычнага досведу, дзе абрад адаптаваны пад удзел гасцей.

Зімовы баль у Лошыцкай сядзібе ў Мінску

25 снежня, у чацвер, у Лошыцкім маёнтку ладзяць зімовы баль.

Да ўдзелу запрашаюцца толькі пары: дама і кавалер.

Дрэс-код: касцюм-тройка, фрак, смокінг (кавалеры), сукенка ў падлогу (дамы).

Карта балю:

• Музычная праграма «У гасцях у казкі» з удзелам лаўрэткі міжнародных конкурсаў Ірыны Лой (сапрана).

• Танцавальнае аддзяленне.

Музей народнай архітэктуры і побыту пад Мінскам

Каляды ў Музеі народнай архітэктуры і побыту аднаўляюць не як шоу, а як абрад.

Аснова праграмы — калядны абыход, у якім могуць паўдзельнічаць і госці музея: калядоўнікі віншуюць гаспадароў, гучаць абрадавыя песні, у тым ліку «Дзе каза ходзіць, там жыта родзіць», з’яўляюцца калядныя персанажы і бэтлеемская зорка. Асобнае месца займае батлейка — традыцыйны лялечны тэатр.

Акрамя абыходу, наведвальнікі змогуць далучыцца да калядных заняткаў — гульняў, танцаў, вырабу ўпрыгажэнняў, а таксама да варажбы.

Кінаканцэрт Івана Кірчука «Калядныя ігрышча» ў Мінску (12+) 

31 снежня, у сераду, у кінатэатры «Піянер» адбудзецца кінаканцэрт Івана Кірчука «Калядныя ігрышча». 

У праграме: 

— ігра на народных музычных інструментах;
— вакальнае выкананне песень;
— паказ неігравых фільмаў пра музычную народную творчасць, пра песенныя традыцыі Беларусі. 

Цудоўная магчымасць праводзіць стары год у кампаніі спадара Івана па добрых калядных традыцыях. 

«Фальварак Раскоша» (Мядзельскі раён)

Па 15 студзеня ў «Фальварку Раскоша» Каляды адзначаюць не ў пэўны час, а па пярэдняй замове. Праграма іх інтэрактыву створаная вакол адноўленага абраду: з каляднымі персанажамі, танцамі, карагодамі і гульнямі.

Наведвальнікам таксама гатуюць традыцыйны абед у карчме, ладзяць майстар-класы і прапануюць заданні і гульні.

Фармат святкавання разлічаны на розныя сцэнары, а пры жаданні можна застацца на ноч.

Гомель

Майстар-клас «Зімовае чараўніцтва свечкі» ў Гомелі (12+)

25 снежня філіял Веткаўскага музея ў Гомелі запрашае на майстар-клас па вырабе калядных свечак з гатовай васковай вашчыны.

Кошт — 10 рублёў. Усе матэрыялы дадуць.

Майстар-клас па вырабе агністага каня ў Гомелі (12+)

Філіял Веткаўскага музея ў Гомелі 27 снежня запрашае на майстар-клас па вырабе чырвонага агністага каня. Кожны зробіць сабе сімвал надыходзячага года. А каб надаць агністаму каню беларускага каларыту, прапануюць зрабіць яго з ільняных нітак.

Кошт — 10 рублёў. Усе матэрыялы дадуць.

Гродна і Гродзенская вобласць

Музейная батлейка «Раство Хрыстова» ў Гродне

25 снежня ў Новым замку ладзяць паказы музейнай батлейкі «Раство Хрыстова». 

Пасля батлейкі вы зможаце наведаць экспазіцыю Новага замка. 

Калядная экскурсія па Гародні

26 снежня, у пятніцу, а таксама ў суботу, трэцяга студзеня, Музей гісторыі рэлігіі ладзіць калядны шпацыр «Віфлеемскі цуд на вулачках Гародні».

Вас чакае:

— Экскурсія ў Музеі гісторыі рэлігіі, падчас якой вы пазнаёміцеся з гісторыяй і традыцыямі свята Божага Нараджэння;

— прагулка па святочным Гродне;

— наведванне каталіцкіх і праваслаўных храмаў. Вы зможаце ўбачыць самую старую батлейку ў Беларусі!

— майстар-клас па стварэнні каляднай зоркі;

— дэгустацыя дэсерту ў рэстаране;

— святочная праграма ў Лютэранскай царквы Святога Іаана.

Дзіцячы калядны баль у Мірскім замку

6 студзеня ў Мірскім замку — традыцыйны дзіцячы калядны баль. Запрашаюць кавалераў і дам ад 6 да 12 гадоў.

Удзельнікі балю не толькі атрымаюць урокі прыдворнага этыкету, пакажуць сваё майстэрства ў старадаўніх танцах, атрымаюць асалоду ад гульняў і загадаюць жаданні.

Разам з казачнымі персанажамі дзеці выправяцца ў падарожжа ў свет танцаў, гульняў і загадак паводле казкі «Шчаўкунок».

Вытанчаныя бальныя паўзы змяняюцца вясёлымі конкурсамі і гульнямі, а класічныя менуэты і паланэзы спецыяльна адаптаваны для дзяцей — лёгка, весела і зусім не нудна. А напрыканцы балю кожнага ўдзельніка чакае падарунак.

Калядны баль у Мірскім замку

10 студзеня, у суботу, у Мірскім замку — традыцыйны Калядны баль.

Таямнічыя маскі і сілуэты, вытанчаныя ўборы і жывая музыка — дазвольце сабе крышачку заблукаць у XVIII стагоддзі!

Вас чакаюць танцавальныя майстар-класы, сюрпрызы і фуршэт.

Дрэскод: для паноў — строгі гарнітур, для паненак — сукенка (пажадана ў стылі XVIII стагоддзі) і абутак без абцасаў. Просяць дапоўніць вобраз маскай.

Літва, Вільня

Батлейка «Мышыныя Каляды» ў Вільні

У нядзелю, 21 снежня, у краме «Кропка» граюць дзіцячы-спектакль-батлейку «Мышыныя Каляды».

Запрашаюць у свет цудаў, дзе на гарышчы маленькія мышаняты зладзілі сапраўдныя Мышыныя каляды — вялікую, шумную і вельмі вясёлую забаву на старадаўні лад.

Калядныя спеўкі ў Вільні

23 снежня ў краме «Кропка» ладзяць калядныя спеўкі.

Тут гавораць пра традыцыі беларускіх Калядаў і вучацца, як можна адсвяткаваць Каляды ў гарадской прасторы. А таксама шмат вучаць і спяваюць беларускіх калядных песень. А там і выправяцца разам калядаваць у Вільні!

Вядоўца — Святлана Чакушка, этнаспявачка, лідарка гурта традыцыйных спеваў «Беларускі цуд», выкладчыца традыцыйнага спеву.

ЗША, Сакрамэнта

Калядная батлейка ад Маляваныча у Сакрамэнта

У нядзелю, 21 снежня, у Сакрамэнта завітвае з каляднай батлейкай акцёр Алесь Ждановіч, ён жа Маляваныч.

Збіраюцца разам ўсёй грамадой, хто на лісапедзе, хто на лыжах, хто проста ўскач па лужынам, ці сумётам ... у тое месца, дзе нас не дагоняць!

Ні злоба, ні цёмная зайздрасць, ні пустыя клопаты! У светлае, вясёлае ДЗЯЦІНСТВА!

Вас чакае:

— Гісторыя беларускай батлейкі

— Казкі, вершы, гульні, забавы для дзяцей

— Рэканструкцыя старажытнага батлеечнага спектакля «Салдат і чорт»

— Тэатр ценяў

Польшча, Варшава

20 снежня Лявон Вольскі і Павел Трыпуць граюць у Варшаве калядны акустычны канцэрт.

Дуэт з дзвюх гітар і адмысловы калядны рэпертуар падораць святочны настрой. Увіткі каштуюць ад 75 злотых. У кошт квітка ўваходзіць прывітальны напой.

Калядныя NAVIBAND у Варшаве 

29 снежня, у панядзелак, коцікі вашых сардэчак NAVIBAND граюць утульны калядны канцэрт у варшаўскім касцёле (Kościół św. Aleksandra, plac Trzech Krzyży). Квіткі каштуюць ад 129 злотых.

Каляда ў Познані

У суботу, 20 снежня, Познанскі Спеўны Сход запрашае ўсіх і кожнага ў гасцінны дворык Барака Культуры сустракаць Каляду.

Парадуюць нечаканымі героямі, прыгожымі спевамі, гульнямі ды варажбой на будучы год. Як Каляду сустрэнеш, такі і год станецца! То цягніце для калядоўшчыкаў мандарынак, шакаладу, сала ды ўсяго, чым багатыя!

Уваход вольны, пачастункі вітаюцца!

Каляднае свята для дзетак у Шчэціне

У нядзелю, 21 снежня, у Шчэціне ладзяць каляднае свята для дзетак.

Вас чакае займальная праграма, салодкія пачастункі, радасныя эмоцыі і, вядома, падарункі для дзяцей! Будуць салодкія пачастункі, але пры жаданні можна прынесці і нешта сваё.

Калядныя спевы з Вольгай Барышнікавай у Беластоку

У суботу, 20 снежня, у Беластоку адбудуцца заняткі па беларускіх традыцыйных калядных спевах.

Вас чакае сустрэча з Вольгай Барышнікавай, даследчыцай-этнамузыкалагіняй, выкладчыцай традыцыйнага спеву, інструменталісткай, лаўрэаткай міжнародных конкурсаў.

Пад апекай Вольгі Барышнікавай будзеце вывучаць калядныя песні і ствараць сабе і адно аднаму святочны настрой.

Калядна-святочная бяседа ў Торуні

У суботу, 20 снежня, беларусы Куява-Памор’я збіраюцца на калядна-святочную бяседу.

У праграме:

— Навагодні святочны квіз з прызамі

— Прыемны пачастунак

— Майстар-клас для дзетак з аніматарам — аздабленне драўляных ялінак

— Караоке і спяванне песень, праектар таксама будзе

— Гарбата і кава — каб сагрэцца ў зімовы дзень

Можаце прыносіць свае стравы да стала! Прыносьце дзіцячыя малюнкі на тэму «Мая навагодняя мара» — зробяць выставу

Чэхія, Прага

Каляды ў Празе

Вас чакае:

— варштат па вырабе калядных аздоб;

— сумесныя спевы калядак;

— прэзентацыя калядных традыцый;

— традыцыйныя танцы.

Каб не прапусціць нічога цікавага, раім падпісацца на адмысловы тэлеграм-бот «Будзьма разам!», які дапамагае падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!

А па гэтай спасылцы можна знайсці афішу бясплатных мерапрыемстваў.