Калі вы раптам яшчэ не вызначыліся, як цікава і з карысцю правесці выходныя, мы падкажам. Канцэрты, маёўка, кватэрнік, спектаклі, выставы, фестываль мастацтваў і нават адукацыйная канферэнцыя — выбірайце мерапрыемствы ў сваім горадзе і на свой густ!
Беларусь
Мінск
У суботу, 3 чэрвеня, завітайце ў Палац мастацтваў на ўрачыстае адкрыццё фестывалю «Арт-Мінск».
«Арт-Мінск» праводзіцца штогод з 2018 года і з’яўляецца адным з найбуйнейшых выставачных праектаў у Беларусі, мэта якога — упрыгожыць культурнае жыццё горада і прадставіць актуальныя напрамкі мастацкай арт-сцэны.
Наведаць можна будзе з 12 траўня па 18 чэрвеня 2023 года.
Ці легка быць кракадзільчыкам ,які мае незвычайны чырвоны колер? Здаецца, ён вельмі яркі і прыгожы, але... Але сам ён не жадае заставацца такім і марыць стаць зялёным, звычайным.
У нядзелю, 4 чэрвеня, тэатр «Дом сонца» ладзіць прэм’ерны паказ беларускамоўнага дзіцячага спектакля «Дзівосныя» паводле кнігі Надзеі Кім «Кразі — чырвоны кракадзільчык». Дзе запісацца, глядзіце па спасылцы.
Фотавыстава Ігара Шалкуненкі «Жыць Жыццё» ў Мінску
1 чэрвеня ў кавярні «ÇAVA» на Макаёнка адкрываецца фотавыстава Ігара Шалкуненкі «Жыць Жыццё».
Выстава працуе да канца чэрвеня. Уваход вольны.
Брэст
У суботу, 3 чэрвеня, археалагічны музей «Бярэсце» ладзіць Ноч музеяў і кліча на Берасцейскую маёўку. Вас чакае знаёмства з берасцейскай модай розных гістарычных эпох, удзел у сярэднявечных гульнях, археалагічны раскоп у незвычайным мастацкім падсвятленні і шмат чаго іншага.
Удзел бяруць:
кампанія «NELVA» з калекцыяй сучаснага жаночага адзення,
краязнаўца і рэканструктар Аляксандр Жаркоў,
Ганна Кавалёва з клубам «Музейная гасцёўня»,
творчы цэнтр «Арт-Піпер»,
фолк-група «Лад».
Гродна
У бары «Урбаніст» адкрылася выстава Міхаіла Анішчанкі «Горад людзей». Гэта атмасферная выстава аб Гродне і гараджанах, якая перанясе вас у зялёны і бесклапотны Гродна 1970-1980 гадоў.
Працуе выстава да 23 чэрвеня.
Гомель
У суботу, 3 чэрвеня, творчая суполка «СТУК» (Свабодная Творчасць Утульных Кварталаў) ладзіць чэрвеньскі акустычны вечар. Пачатак а 17:00.
Гэтым разам адмысловы госць — гурт «Увага». І, вядома, шмат іншых выканаўцаў, якія запісаліся на выступ.
Спіртныя напоі забаронены, уваход вольны.
Пінск
У нядзелю, 4 чэрвеня, гусляр Алесь Чумакоў прыбывае туды, каб прэзентаваць свежанькі свой альбом «Летуценнік».
Вас чакае класіка року па-беларуску ды пад гуслі! Вам жа хацелася, каб Фрэдзі Мэрк’юры ці Пол Маккартні заспявалі па-беларуску? А вялікі й жахлівы Озі Осбарн? А Віктар Цой? Так будзе!
Літва
Вільня
У чацвер, 1 чэрвеня, у Вільні адкрылася выстава «Я хачу дадому», якую ладзіць арт-суполка Heartbreaking Performance Art Group.
Акрамя фотачак Мінска ад беларускіх фатографаў у эміграцыі зможаце слухаць саўндскейп Менску, пабачыце AR аб’екты, паглядзіце фільм, зможаце пакутаваць у Пакоі Спакою і нават... забраць Мінск дадому — у выглядзе паштовак і альбому Take Minsk Home.
Польшча
Варшава
У суботу, 3 чэрвеня легенда беларускага рэггі Эдуард Юдовін з гурта «Алмазный фронт» грае ў Варшаве канцэрт.
Адмысловы госць — Аляксандр Памідораў.
Беласток
У суботу, 3 чэрвеня, ва Універсітэце Беластока адбудзецца канферэнцыя «I Міжнародны дзень беларускай адукацыі». Абмяркуюць навучанне на беларускай мове і настаўніцкія майстэрні ў асяроддзі беларускай нацыянальнай меншасці ў Польшчы і ва ўмовах эміграцыі.
А таксама — сацыялізуючую і культураўтваральную ролю мовы, творчае пісьмо, адаптацыю дзяцей да польскай сістэмы адукацыі, пра беларускі кампанент у польскім адукацыйным асяроддзі ды іншыя тэмы.
Кракаў
Гэтымі выходнымі, 3 і 4 чэрвеня, у Кракаве распачынаецца фестываль «Культура ў выгнанні». Гэта два дні імпрэз ад беларускіх дзеячоў культуры: творчыя сустрэчы, спектаклі, майстар-класы ды канцэрты.
Эстонія
Талін
Трэцяга чэрвеня (гэта будзе субота) касмічная Shuma грае ў сэрцы Таліна канцэрт на вольным паветры з нагоды Дзён Старога горада! Кампанію складзе фольк-гурт JASAKAR!
Будзе лямпавае свята з варкшопам, на якім нават можна будзе самому зрабіць невялікі сувенір з керамікі. Будуць напоі і кактэйлі, гутаркі і цёплы летні вечар.
ЗША
Н'ю-Ёрк
У нядзелю, 4 чэрвеня, у Брукліне прэзентуюць кнігу Міхася Кавыля «Выбранае», а таксама ладзяць вечарыну памяці беларускіх паэтаў у ЗША.
Імпрэза адбудзецца ў межах месяца памяці спадчыны эмігрантаў #ImmigrantHeritageMonth.
Больш беларускіх падзеяў шукайце ў нашай Афішы.
Калі сярод прапанаваных варыянтаў не знайшлося нічога па душы, раім выправіцца ў вандроўку па Беларусі. Скласці цікавы маршрут дапаможа наша рубрыка «Вандруем разам».
Каб не прапусціць нічога цікавага, раім падпісацца на адмысловы тэлеграм-бот «Будзьма разам!», які дапамагае падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!
Карыстацца ім вельмі проста: выбірайце той ці іншы горад або ўсю краіну, падпісвайцеся асобна на ўсе анлайн-мерапрыемствы ці выбірайце варыянт all inclusive — усе беларускія падзеі свету (у тым ліку і анлайн-мерапрыемствы). А пасля — сачыце за беларускім дзвіжам і далучайцеся!
А па гэтай спасылцы можна знайсці афішу бясплатных мерапрыемстваў.Больш беларускіх падзеяў шукайце ў нашай Афішы.
