Кафедра беларусістыкі Варшаўскага ўніверсітэта правядзе вялікую міжнародную навуковую канферэнцыю. Яна адбудзецца ў панядзелак, 7 красавіка, паведамляе Беларускае Радыё Рацыя. Тэма падзеі — «Польска-беларускія моўныя, літаратурныя, культурныя і гістарычныя сувязі».

Пра значнасць мерапрыемства, яго фармат і спікераў Госць Рацыі — загадчык кафедры, прафесар, доктар навук Андрэй Масквін.

РР: Што будзе ўяўляць сабой канферэнцыя?

Андрэй Масквін: Гэта наша штогадовая канферэнцыя. Вельмі важная для нас, таму што мы можа адзіная кафедра па-за межамі Беларусі, якая менавіта кафедра беларусістыкі. І для нас вельмі важна не толькі паказаць, што мы як кафедра робім, у якім напрамку працуем, але сабраць вакол сябе спецыялістаў, у першую чаргу гэта, канешне, літаратуразнаўцы і мовазнаўцы, але таксама будуць і культуразнаўцы, гісторыкі, і для нас важна сабраць гэтых людзей і агучыць тыя тэмы і праблемы, якімі мы сёння займаемся.

Раней у нас заўсёды былі традыцыйныя секцыі мовазнаўства і літаратуразнаўства, а ў гэтым годзе я стараўся, каб былі секцыі больш мэтанакіраваныя, і адна з секцый будзе прысвечана 10-годдзю працоўні, якая займаецца выкладаннем беларускай мове за мяжой, і другая секцыя — прысвечаная творчасці Альгерда Бахарэвіча. Такая думка ў мяне ўзнікла пасля таго, як адбыўся ягоны юбілей — 50-годдзе. Я думаю, што гэта той час, каб падсумаваць тое, што зроблена ім і яго ўплыў на сучасную беларускую літаратуру і на тое, як мы, яго сучаснікі, успрымаем ягоную прозу і як гэта ўплывае на нашу свядомасць і якое мае значэнне ў кантэксце беларускай літаратуры.

РР: Вельмі шмат спікераў прыме ўдзел у гэтай канферэнцыі. Распавядзіце, калі ласка, пра іх.

Андрэй Масквін: Гэта некалькі асобаў з нашай кафедры. Але мы тут не галоўныя. Для нас вельмі важна, каб госці выступілі, прыехалі. Ёсць тыя асобы — Катажына Вашчынская, Алена Глагоўская, Сяргей Кавалёў, якія да нас прыязджаюць штогод, з імі мы супрацоўнічаем і заўсёды друкуем іх тэксты. Але для нас важна, каб прыехалі маладыя даследчыкі. І ў гэтым годзе я здзівіўся, бо калі мы рассылаем праграмку-запрашэнне, то яна трапляе да тых, каго мы ведаем. Але сёлета ёсць нейкая частка людзей, якая атрымлала інфармацыю выпадкова. І ў нас у праграме будуць асобы, якія ніколі не ўдзельнічалі ў нашай канферэнцыі. Гэта маладыя даследчыкі, якія ўжо некалькі гадоў у эміграцыі, перадусім ў Польшчы, Літве і Нямеччыне, якія першы раз будуць удзельнічаць у нашай канферэнцыі. Так што гэта такія тры катэгорыі асобаў.

РР: Можа вы б маглі назваць некаторыя прозвішчы?

Андрэй Масквін: Для нас важна, што будзе прадстаўлены Інстытут беларускай мовы, які стварыўся нядаўна ў Познані. Ён ужо афіцыйна зарэгістраваны. Яго ўзначальвае Святлана Лясовіч. А разам з ёй прыедуць яшчэ дзве іншыя асобы — Ксенія Забаштанская і Лілея Плыгаўка. З імі таксама прыедзе яшчэ Уладзімір Лобач, незалежны даследчык, які будзе нам распавядаць пра канцэпцыю курса беларусазнаўства. Яны, як інстытут, пачалі можа не ствараць такі курс, але яго апрацоўваць, думаць над тым, якім ён павінен быць. І першыя вынікі сваёй працы яны запрэзентуюць нам на гэтай канферэнцыі.

Затым нам вельмі важныя кантакты з тымі ўніверсітэтамі, з якімі мы сябруем. Гэта ўніверсітэт у Банска-Быстрыцы, мы з ім падпісалі дамову, і прафесар гэтага ўніверсітэта Вікторыя Ляшук прыедзе да нас і будзе распавядаць пра розныя аспекты выкладання беларускай мовы ў Славаччыне.

З віленскага Еўрапейскага ўніверсітэта прыедзе Уладзіслаў Іваноў, якога, напэўна, усе ведаюць, бо ён у апошнія гады вельмі актыўны — перакладае, піша кнігі, выкладае ў Еўрапейскім універсітэце і на фестывалі «Прадмова» ўдзельнічаў. Будзе Віктар Корбут, які абараніў кандыдацкую дысертацыю, ён будзе распавядаць пра першыя нашы газеты «Наша Доля» і «Наша Ніва». У наступным годзе будзем адзначаць 120-годдзе з дня заснавання «Нашай Нівы». Прыедуць маладыя даследчыкі Ганна Нікіцюк, Аляксандр Пагарэлы, яны раней не ўдзельнічалі ў нашай канферэнцыі. Прыедзе Віктар Халіпаў з Клайпеды. Прыедзе Анастасія Гуліна з Любліна, якая заканчвае сваю кандыдацкую дысертацыю, прысвечаную беларускай драматургіі. Прыедуць таксама з Любліна Наталля Русецкая і Ірына Лапа. Ірына будзе ўдзельнічаць у сесіі, прысвечанай Бахарэвічу, а Наталля будзе распавядаць пра траўматычны досвед 2020 году ў беларускай паэзіі. Прыедзе з Вільні Эла Калкоўская. І з Варшаўскага ўніверсітэту будзе Інэса Шульская.

Рэгістрацыя ўдзельнікаў пачнецца ў 10:45 на факультэце прыкладной лінгвістыкі (аўдыторыя 1.008; І паверх).