Праект накіраваны на апрацоўку, захаванне і анлайн-прэзентацыю часткі калекцыі, якая асвятляе сучасную гісторыю грамадзянскага супраціву ў Беларусі. У рамках праекта плануецца прафесійная лічбавая апрацоўка і архіваванне артэфактаў музея (творы мастацтва, дакументы, асабістыя рэчы ўдзельнікаў пратэсту, фатаграфіі), а таксама іх публікацыя ў выглядзе анлайн-каталога з дакладнымі апісаннямі і кантэкстуалізацыяй.

Задача праекта — забяспечыць доўгатэрміновае захаванне і шырокі анлайн-доступ да выбраных артэфактаў з калекцыі, звязаных з беларускімі пратэстамі, палітычнымі рэпрэсіямі, а таксама антываенным рухам і жыццём беларускай супольнасці ў эміграцыі, паведамляецца на старонцы музея ў Фэйсбук.

У межах праекта запланаваны:

• адбор 200 артэфактаў і іх апісанне, якое змесціць асноўныя метаданыя, гісторыю паходжання, культурны і палітычны кантэкст;
• лічбавізацыя і апрацоўка матэрыялаў: кожны аб’ект будзе адсканіраваны або сфатаграфаваны ў высокай якасці з выкарыстаннем прафесійнага абсталявання, з улікам захавання мастацкіх і матэрыяльных асаблівасцяў;
• стварэнне анлайн-базы (каталога) на трох мовах (польская, беларуская, ангельская) з фільтрамі, візуальнымі прэв’ю і функцыямі пошуку. Каталог будзе даступны шырокай публіцы.

Сталая экспазіцыя Музея Вольнай Беларусі. Студзень 2025 г.

Рэалізацыя гэтага праекта дасць магчымасць:

• захаваць і зрабіць публічна даступнымі ключавыя артэфакты новай гісторыі Беларусі;
• задзейнічаць інструменты лічбавай гуманітарыстыкі для папулярызацыі тэмы грамадзянскай супольнасці і антыаўтарытарнага руху;
• падтрымаць беларускую культуру і супраціў у міжнародным кантэксце.

У рамках праекта таксама прадугледжваецца стварэнне віртуальнай выставы музейных экспанатаў і правядзенне адукацыйных мерапрыемстваў для ўдзельнікаў Беларускай музейнай лабараторыі, скіраваных на абмен досведам, навучанне і распрацоўку рэкамендацый па лічбавізацыі культурнай спадчыны.

Сталая экспазіцыя Музея Вольнай Беларусі. Студзень 2025 г.

«Праект ажыццяўляецца ў межах праграмы «Лічбавая культура 2025» і сафінансаваны за кошт сродкаў Міністра культуры і нацыянальнай спадчыны Польшчы, атрыманых з Фонду падтрымкі культуры — дзяржаўнага мэтавага фонду.

Сачыце за навінамі — будзе шмат цікавага! І запрашаем да супрацы — мы будзем удзячны за перадачу артэфактаў з вашых прыватных калекцый (у тым ліку на ўмовах ананімнасці) у фонд Музея Вольнай Беларусі дзеля захавання нашай агульнай гісторыі!», — напісана ў сацсетках музея.