Калі вы раптам яшчэ не вызначыліся, як цікава і з карысцю правесці выходныя, мы падкажам. Дабрачынная экскурсія ў Мінску, прысвечаная Змітраку Бядулю, Саракі ў Азярцы, вясновы фэст у Вязынцы, адкрыццё новага шведскага гуртка «Бел.Літ» у Вільні, экскурсія па-беларуску па Беластоку, беларускія танцы ў Варшаве, прэзентацыя кнігі Ганны Комар у Тбілісі, майстар-класы, канцэрты, выставы, спектаклі — выбірайце падзеі ў сваім горадзе і на свой густ.
Беларусь
Мінск і Мінская вобласць
Дабрачынная экскурсія ў Мінску, прысвечаная Змітраку Бядулю
6 красавіка, у суботу, Музей гісторыі беларускай літаратуры запрашае на экскурсію, прысвечаную аднаму са знакамітых гаспадароў музея «Беларуская хатка» — класіку беларускай літаратуры Змітраку Бядулю.
На экскурсіі вы больш даведаецеся пра Змітрака Бядулю як таленавітага пісьменніка, чые творы былі ўзгадаваныя на беларускай глебе, напітаныя фальклорна-міфалагічнымі крыніцамі, напоўненыя любоўю да роднай зямлі і беларускага народа. Вы адкрыеце для сябе Змітрака Бядулю як актыўнага ўдзельніка літаратурна-грамадскага руху пачатку XX ст. у Мінску.
Экскурсія з’яўляецца дабрачыннай — заробленыя грошы будуць пералічаны на спецыяльны рахунак, дзе акумулююцца сродкі на стварэнне надмагільнага манумента класіку.
Саракі ў Азярцы
У суботу, 6 красавіка, у музеі народнай архітэктуры і побыту ў Азярцы — Саракі.
Саракі — свята ў народным календары, якое прыпадае на другі дзень веснавога раўнадзенства.
Магчыма, менавіта Саракі былі самым старажытным святам сустрэчы новага года, якое захавалася ў беларускай культуры ў наш час.
Саракі сканцэнтравалі ў сабе практычна ўсе характэрныя рысы веснавой абраднасці — матывы пачатку года, культу продкаў,а таксама ачышчальную, прадукавальную, ахоўную і мантычную магію.
Галоўным сімвалам свята з’яўляюцца птушачкі-жавароначкі, якія, па ўяўленнях нашых продкаў, і прыносілі з выраю веснавое сонца.
Вясновы фэст у Вязынцы
У нядзелю, 7 красавіка, у Вязынцы гукаюць вясну разам са Студэнцкім этнаграфічным таварыствам!
Вас ужо чакаюць не дачакаюцца веснавыя песні і карагоды разам з усімі ўдзельнікамі свята.
У праграме:
12.30 — 17.00 — кірмаш рамёстваў, святочная фотазона і традыцыйная кухня
13.00 — 14.30 — загукальныя песні на гары, веснавыя карагоды
13.30— 17.00 — розныя майстар-класы для дзяцей і дарослых па народным рамёствам
14.30 — 17.00 — народныя танцы з удзелам цудоўных музыкаў
15.00 — 16.00 — майстар-клас па прыгатаванні вясковага сыру.
Гомель
Майстар-клас па гарлячках у Гомелі
У суботу, 6 красавіка, філіял Веткаўскага музея ў Гомелі паўтарае круцецкі майстар-клас па гарлячках.
Гарлячка — гэта шыйнае ўпрыгожванне з бісеру. Такі сабе неглюбскі чокер. Гарлячка была штодзённым упрыгожваннем, якое яшчэ ў першай палове 20 стагоддзя насілі амаль усе жанчыны любога ўзросту.
На майстар-класе кожны пачне рабіць сваю гарлячку.
Не будзе часу зрабіць яе цалкам, але вы будзеце ведаць тэхналогію і лёгка зможаце скончыць упрыгожванне дома. Бісер для ўпрыгожвання дадуць.
Але калі вы хочаце ўзяць пэўны з сабой, то спатрэбіцца бісер 2-х ці 3-х колераў — па два пакецікі кожнага колеру. Памер бісернай пацеркі — на ваш выбар. Чым буйнейшыя пацерка — тым хутчэй спляцецца гарлячка, але і больш масіўная яна атрымаецца.
Грузія
Тбілісі
Прэзентацыя кнігі Ганны Комар «Калі я выйду на волю» ў Тбілісі
У суботу, 6 красавіка, Ганна Комар прэзентуе ў Тбілісі сваю кнігу «Калі я выйду на волю».
Пасля прэзентацыі можна будзе набыць кнігу.
Літва
Вільня
Шведскі гурток «Бел.Літ» у Вільні
У суботу, 6 красавіка, ініцыятыва «Актыўнымі быць файна» распачынае новы гурток «Бел.Літ».
Любіце чытаць і любіце беларускую мову?
Размаўляеце на роднай мове ці хочаце пачаць, але ніяк не можаце?
Спыняе сарамлівасць, высокія патрабаванні да сябе ці няма бяспечнай прасторы і аднадумцаў?
Тады завітвайце на адкрыццё новага шведскага гуртка «Бел.Літ».
Прэзентацыя зборніка «Карані / лісце» ў Вільні
У суботу, 6 красавіка, у Вільні прэзентуюць зборнік «Карані / лісце» — зборнік дэкаланіяльных тэкстаў, напісаных жанчынамі, транс і небінарнымі людзьмі з Беларусі.
Ён паўстаў у выніку пісьменніцкай лабараторыі, праца якой цягнулася апошнія паўгода і аб’яднала 50 літаратара:к, што цяпер жывуць у розных краінах. На сустрэчы пагутараць з аўтар:камі пра пісьмо і дэкаланіяльнасць у ім, падзеляцца досведам працы лабараторыі і паслухаюць чытанне тэкстаў.
На прэзентацыі можна будзе набыць асобнік за любую камфортную для вас суму.
Польшча
Беласток
Экскурсія па-беларуску па Беластоку
У суботу, 6 красавіка, беларусаў Беластока клічуць на беларускамоўную экскурсію па Рынку Касцюшкі.
Чулі жарт, што ў Беластоку часам можна пачуць пытанне пра часы працы «Рынка Касцюшкі»?
Чаму ж цэнтральная гарадская плошча называецца «рынак», хоць і блізка не «рынак»?
Што за будынкі атачаюць Рынак Касцюшкі? І чаму яны такія.. розныя?
А можа заўважалі, колькі на іх цікавых малюнкаў? Манеты, партрэты, фігуркі... Пра што яны?
Пра ўсё даведаецеся ў суботу!
Варшава
Беларускія танцы ў Варшаве
У суботу, 6 красавіка, у Варшаве танчаць беларускія танцы.
Цяпер дадатковыя заняткі для пачаткоўцаў будуць і ў выходныя.
Заняткі праводзіць дасведчаная аматарка і актывістка, закаханая ў традыцыйны танец, Наталка Гапановіч.
ЗША
Н'ю-Ёрк
Сустрэча з Сяргеем Навумчыкам у Н’ю-Ёрку
У нядзелю, 7 красавіка, у Н’ю-Ёрку адбудзецца сустрэча з палітыкам і журналістам Сяргеем Навумчыкам.
Спадар Сяргей — дэпутат Вярхоўнага Савета Беларусі 1990-1996 гадоў, які уваходзіў у склад парлямэнцкай апазыцыі БНФ.
З 1996 года — у палітычнай эміграцыі.
Аўтар шэрагу кніг на тэму найноўшай гісторыі Беларусі, ляўрэат літаратурнай прэміі Алеся Адамовіча Беларускага ПЭН-цэнтру.
Прыходзьце задаць пытаннечкі і пачуць цікавыя факты з найноўшай гісторыі Беларусі ад непасрэднага ўдзельніка падзей таго часу.
Больш беларускіх падзей шукайце ў нашай АФІШЫ.
Калі сярод прапанаваных варыянтаў не знайшлося нічога па душы, раім выправіцца ў вандроўку па Беларусі. Скласці цікавы маршрут дапаможа наша рубрыка «Вандруем разам».
Каб не прапусціць нічога цікавага, раім падпісацца на адмысловы тэлеграм-бот «Будзьма разам!», які дапамагае падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!
А па гэтай спасылцы можна знайсці афішу бясплатных мерапрыемстваў.
