У Гомелі пачаліся работы па ўсталяванні помніка расійскаму генерал-фельдмаршалу Івану Паскевічу. Месца для яго выбралі больш чым сімвалічнае — адну з галоўных гістарычных і турыстычных кропак горада, піша «Штодзень».
Фота: wikimedia.org
Помнік з’явіцца ў парку каля старога моста XIX стагоддзя праз Гамеюк. Менавіта ў раёне ўпадзення гэтай невялікай ракі ў Сож знаходзілася старажытнае паселішча, з якога вырас Гомель. З Гамеюком звязваюць і паходжанне назвы горада. Цяпер частка набярэжнай каля моста перагароджаная будаўнічай агароджай. На месцы будучага манумента пакуль усталяваны невялікі камень з таблічкай «Тут будзе ўсталяваны помнік». І прыпіска: «Ад Расійскага ваенна-гістарычнага таварыства». Работы знаходзяцца на пачатковай стадыі, тэрміны іх завяршэння пакуль невядомыя.
Пра намер усталяваць у Гомелі помнік Паскевічу стала вядома ў красавіку. Тады дзеля ўзгаднення макета ў Маскву ездзіў былы кіраўнік Гомеля Уладзімір Прывалаў. Ініцыятарам праекта выступіла Расійскае ваенна-гістарычнае таварыства. Гэтая ж арганізацыя раней «падарыла» Гомелю помнік савецкаму ваеначальніку Канстанціну Ракасоўскаму.
Будучы манумент мае выразную імперскую адсылку. Гомельскі помнік павінен паўтарыць манумент Паскевічу, які некалі стаяў у Варшаве. Іван Паскевіч камандаваў расійскімі войскамі пры падаўленні Лістападаўскага паўстання 1830–1831 гадоў, пасля чаго атрымаў тытул князя Варшаўскага і стаў царскім намеснікам у Царстве Польскім. Пры гэтым вобраз Паскевіча ў гарадской прасторы Гомеля ўжо прысутнічае. У парку знаходзіцца скульптурная кампазіцыя «Прагулка з хартамі», адкрытая ў 2015 годзе. Яна паказвае Фёдара Паскевіча — сына Івана Паскевіча і апошняга прадстаўніка роду, які валодаў гомельскім маёнткам, — падчас шпацыру з ягонымі хартамі Лордам і Марка. Такім чынам, гаворка ўжо ідзе не пра адзін асобны манумент.
Фота: wikimedia.org
Такім чынам, у гістарычным цэнтры Гомеля паступова фармуецца цэлы культ Паскевічаў, а новы этап гэтага працэсу адбываецца пры непасрэдным удзеле расійскай ваенна-гістарычнай арганізацыі.
