А вы елі калі-небудзь ракаў? Калі не, то варта абавязкова пакаштаваць. Каб іх здабыць узімку, нашыя продкі ныралі ў ледзяныя палонкі. Цяпер ракаў можна проста набыць у краме, прыгатаваць з іх смачную страву і пачаставаць ласункам сяброў. Чаму людзі гінулі за ракаў і як іх смачна прыгатаваць, распавядаем у артыкуле.
Чаму за ракаў гінулі людзі?
Ракаў елі вельмі здаўна. Іх збіралі на берагах вадаёмаў, варылі ці смажылі на вогнішчы, прадзеўшы на палачку. З часам спосабы прыгатавання ракаў удасканальваліся, іх варылі ўжо ў булёне ці піве на зеляніне і розных прынадах. Ракаў елі як простыя людзі, так і заможныя. Мяса ракаў дадавалі ў халаднік. Але найсмачнейшы спосаб прыгатавання — ракі ў сметанковым соусе. Гэтая страва была сапраўдным далікатэсам на сталах заможнай шляхты і магнатаў.
Улетку ракаў мог налавіць кожны, хто не лянаваўся, а вось узімку, калі вадаёмы пакрываліся лёдам, здабыць іх было амаль немагчыма. Заможная шляхта і магнаты плацілі вялікія грошы простым людзям, каб тыя прарубалі палонкі і ў жудасны мароз ныралі ў ледзяную ваду за ракамі. Шмат людзей замярзалі насмерць, здабываючы ракаў узімку.
Як прыгатаваць ракаў?
Ракаў трэба добра прамыць, потым выдаліць стрававод. Для гэтага трымайце іх за сярэдні плаўнік на хвасце, паварочвайце яго ўлева і ўправа, потым цягніце. Без стрававода мяса нашмат смачней.
У ваду пакладзіце зялёную цыбулю, кроп, перац гарошкам і добра пасаліце. Мяса хаваецца пад цвёрдым хіцінам, таму перасаліць яго складана. Калі булён закіпіць, кідайце туды ракаў і варыце 10 хвілін. Дайце ім астынуць у гэтым булёне, няхай водар прынадаў і соль крыху насыцяць ракаў.
Пакуль ракі астываюць, насячыце зялёную цыбулю і кроп, нарэжце сярэднімі кавалкамі пару зубкоў часнаку — яны растушацца ў вяршках і нададуць асаблівы смак і водар страве.
Калі ракі асытнуць, разагрэйце алей на патэльні і закіньце іх туды. Прасмажыць трэба літаральна хвілінку, каб алей увабраў у сябе пах ракавага хіціну. Затым наліце вяршкі і дадайце часнок, пастаянна памешваючы страву. Калі з’явіліся бурбалкі, то можна дадаваць зеляніну, соль і перац — па смаку. Пратушыць 5 хвілін такім чынам, не забываючы памешваць, а затым даць крыху астынуць у соусе.
Ракаў выкласці ў посуд і паліць зверху сметанковым соусам. Запіваць такую страву смачна квасам.
Лайфхак ад «Будзьма» — калі вы не аматар ракаў, можаце прыгатаваць такую страву з крэветкамі Ачысціце іх і, папярэдне не адварваючы, патушыце ў сметанковым соусе.
Смачна есці!
Нам спатрэбіцца:
Ракі — 500 грамаў
Вада — 2 літры
Вяршкі — 200 мілілітраў
Зялёная цыбуля — два пукі
Кроп — два пукі
Часнок — 5 зубкоў
Перац гарошкам — 20-25 пярчынак
Перац молаты і соль — па смаку
Больш рэцэптаў серыі «Гатуем з "Будзьма"» глядзіце тут.
