Нацыянальны банк Рэспублікі Беларусь выпусціў серыю памятных манет, прысвечаных беларускай чыгунцы, піша reform.news са спасылкай на сайт банка.
Манеты серыі «Гісторыя беларускай чыгункі. Цягнікі». Фота: nbrb.by
Усяго ў серыі «Гісторыя беларускай чыгункі. Цягнікі» пяць відаў манет наміналам у 2 рублі. На іх размясцілі выявы розных відаў чыгуначнага транспарту: паравоза, цеплавоза, электравоза, дызеля і электрацягніка.
Манеты маюць форму круга дыяметрам у 23,5 міліметра і важаць 5,81 грама. Сярэдзіна выраблена са сталі, пакрытай меддзю і нікелем, а кольца — са сталі, пакрытай меддзю і латунню. Тыраж кожнага віда — 25 тысяч штук.
Іх чаканілі на Казахстанскім манетным двары Нацыянальнага банка Казахстана.
У Беларусі яны з’яўляюцца законным плацежным сродкам — іх абавязаны прымаць па ўказаным кошце пры ўсіх відах плацяжоў без абмежаванняў.
