Мінгарвыканкам адказаў на зварот наконт земляных работ уздоўж яўрэйскіх могілак у Мінску, у выніку якіх з зямлі былі вынятыя яўрэйскія надмагіллі і фрагменты могілкавай брамы, піша тэлеграм-канал «Спадчына».
Фота: тэлеграм-канал «Спадчына»
Паводле прадастаўленай чыноўнікам Інстытутам гісторыі інфармацыі могілкам XIX — першай паловы XX стст. не надаецца статус помніка археалогіі. Цікавае сцвярджэнне, якое супярэчыць палажэнням Кодэкса аб культуры.
Фота: тэлеграм-канал «Спадчына»
Агляд археолагамі Інстытута адвала грунта, а таксама профіляў траншэі, паказаў адсутнасць культурнага слою, чалавечых рэштах і археалагічных знаходак.
Выяўленныя пры работах мацэвы адміністрацыя раёна разам з Міжнародным адукацыйным цэнтрам імя Яганэса Рау плануе размясціць з раней выяўленымі надмагіллямі на поўнач ад месца знаходкі.
Фота: тэлеграм-канал «Спадчына»
Фрагменты мураваных і металічных канструкцый, элементы дэкору брамы адукацыйны цэнтр, якому належаць Гістарычныя майстэрні імя Леаніда Левіна, гатовы размясціць у адноўленым будынку пасля заканчэння рэканструкцыі ў якасці часткі экспазіцыі.
Таксама ў лісце адзначаецца, што ў 2019-2020 гг. неаднаразова паступалі прапановы і абгрунтаванні аб наданні тэрыторыі былых яўрэйскіх могілак статусу гісторыка культурнай каштоўнасці. Але гэтыя прапановы былі адхілены праз неадпаведанасць артыкулам 92 і 93 Кодэкса аб культуры.
