Журы прэміі імя Францішка Багушэвіча сфармавала доўгі спіс з твораў, выдадзеных у 2025 годзе і намінаваных на конкурс прэміі, піша Беларускі ПЭН.
З 24 твораў, уключаных у поўны спіс, у наступны этап конкурсу прайшлі 12 — тыя, што, паводле ацэнкі журы, не толькі адпавядаюць мэтам прэміі, але найбольш выразна і арыгінальна асэнсоўваюць тэмы беларускай гісторыі, культуры і нацыянальнай ідэнтычнасці.
Сёлета конкурс ізноў засведчыў разнастайнасць падыходаў і формаў: у доўгі спіс увайшлі як кнігі, так і медыйныя праекты — падкасты, блогі і даследаванні, што прапануюць новыя перспектывы для вывучэння гістарычнай спадчыны і пашырэння беларускай культуры.
У доўгі спіс прэміі ўвайшлі:
Кнігі:
- «І даўней так пелi: Музычны фальклор старавераў паўночна-заходняй Беларусі» — Вольга Барышнікава (Skaryna Press, Лондан, 2025)
- «Патаемная спадчына. Казкі пра беларускіх жанчын». Том 1 i 2 — фундацыя BYPROSVET (BYPROSVET/Magenta, Варшава, 2025)
- «Проста з любові. Рэпарцёрскія партрэты памяці» — Ганна Кандрацюк (выдавецтва Цэнтра беларускай культуры ў Беластоку, Беласток, 2025)
- «Апошнія сведкі Гродна» — Руслан Кулевіч (самвыд, Польшча, 2025)
- «На «Старт» і ў «Тэмпе»: Ножны шпурляк на Аршаншчыне» — Арцём Сізінцаў (Skaryna Press, Лондан, 2025)
- «Кола дня» — Аляксандра Турава (2025, зашыфраваны ўдзел)
- «Кровазварот» — Юлія Цімафеева (Янушкевіч, Варшава, 2025)
- «Цені падмуркаў» — Milestone (2025, зашыфраваны ўдзел)
Артыкул у медыя, падкаст, кіно, відэа/відэацыкл, іншае:
- Тэлевізійны праект «Сармацкі вус» — аўтар і вядоўца Цімафей Акудовіч
- «Беларусь як «культурное падабенства каланіяльнай Афрыкі», ці Антыкаланіяльнае паўстанне камуніста Аляксея Каўкі» — Таццяна Астроўская (артыкул у часопісе «Topos», Вільня, 2025)
- Падкаст «Літаратурныя зацемкі» — Сяргей Дубавец
- Відэаблог пра беларускую кухню «Pr0Food» — Сяргей Мазан
Журы адзначае, што працы доўгага спіса вылучаюцца не толькі якасцю выканання, але і здольнасцю весці дыялог з сучаснасцю праз асэнсаванне мінулага — часта складанага, супярэчлівага, але неабходнага для разумення беларускай ідэнтычнасці.
Прэмія імя Францішка Багушэвіча, заснаваная ў 1996 годзе, штогод адзначае найлепшыя творы, прысвечаныя гісторыі і культуры Беларусі. Яна заклікана падтрымліваць даследаванні, мастацкія і медыйныя праекты, што ўмацоўваюць беларускую культурную прастору і спрыяюць аднаўленню гістарычнай памяці.
Калі вы працуеце ў Літве, вы можаце падтрымаць «Будзьма беларусамі!», пералічыўшы нам 1,2% ад сваіх падаткаў. Вам уласна гэта не будзе каштаваць анічога.
