19 снежня 2016 года а 16-й гадзіне ў Дзяржаўным літаратурна-мемарыяльным музеі Якуба Коласа адбудзецца ўрачыстае адкрыццё выстаўкі старшыні Азербайджанскага саюза карыкатурыстаў, Заслужанага дзеяча мастацтваў Азербайджанскай Рэспублікі Байрама Гаджызадэ.
Байрам Гаджызадэ з адзнакай скончыў Азербайджанскую дзяржаўную мастацкую школу імя А. Азімзадэ, а потым стаў выпускніком факультэта графікі Азербайджанскага дзяржаўнага ўніверсітэта культуры і мастацтваў, працаваў галоўным саветнікам у рэдакцыі папулярнага сатырычнага часопіса “Кірпы”, галоўным рэдактарам часопіса «Biz və Karikatura» («Мы і карыкатура»).
Вядомы мастак абараніў дысертацыю на тэму «Развіццё карыкатуры», выкладае ў Азербайджанскай дзяржаўнай мастацкай акадэміі на кафедры “Гісторыя і тэорыя мастацтва”, працуе над доктарскай дысертацыяй на тэму «Асаблівасці цэласнасці формы і адзінства ў азербайджанскай і сусветнай сатырычнай графіцы», стаў аўтарам 9 манаграфій, каля 50 навуковых і публіцыстычных артыкулаў, навучальных дапаможнікаў і праграм. Указам Прэзідэнта Азербайджанскай Рэспублікі Байрам Гаджызадэ ўдастоены ганаровага звання «Заслужаны дзеяч мастацтваў».
Развіццё сучаснай сусветнай сатырычнай графікі таксама звязана з імем мастака. Байрам Гаджызадэ з’яўляецца прэзідэнтам азербайджанскай групы ў Міжнароднай федэрацыі аб’яднанняў карыкатурыстаў «FECO»; членам рэдакцыйнай калегіі часопіса «FECONEWS», які выдаецца ў Еўропе; кіраўніком праекта і афіцыйным арганізатарам міжнароднага конкурса карыкатуры «Молла Насрэддзін», які праводзіцца ў г. Баку; членам міжнароднага клуба карыкатурыстаў «Cartoonion» (ЗША); уваходзіць у склад рэдкалегіі міжнароднага клуба «Вялікая энцыклапедыя карыкатуры» (Іспанія), абраны ганаровым членам асацыяцыі карыкатурыстаў горада Тэбрыз (Іран).
Усе творчыя работы мастака выпраменьваюць бліскучыя ўсмешкі, і ў той жа час яны насычаны тонкай іроніяй. Нездарма графічным работам Байрама Гаджызадэ прысуджаны ўзнагароды на міжнародных конкурсах і фестывалях карыкатуры ў 19 краінах свету – Кітай, Карэя, Турцыя, Румынія, Украіна, ЗША, Куба і іншыя.
На персанальнай выстаўцы мастака будуць прадстаўлены работы, якія былі прэміраваны на розных міжнародных конкурсах у апошнія гады.
САРДЭЧНА ЗАПРАШАЕМ!
