Адкрыццё выставы “Малая радзіма. Мясціны, любыя сэрцу”

23 жніўня 2018 года а 16-й гадзіне ў мастацкай галерэі “Універсітэт культуры” адкрыецца выстава “Малая радзіма. Мясціны, любыя сэрцу” студыі выяўленчага мастацтва “Вясёлка” Палаца дзяцей і моладзі г.Наваполацка.

     “Застаюцца песня і Радзіма.

        Можа ўсе прайсці, але яны

        Лёс напоўняць сілаю адзінай,

        Што ад хваляў полацкай Дзвіны”.

                          Навум Гальпяровіч.

У межах Года малой радзімы і з нагоды акцыі “Наваполацк – культурная сталіца 2018” юныя мастакі студыі выяўленчага мастацтва “Вясёлка” Палаца дзяцей і моладзі г.Наваполацка падрыхтавалі выставу, прысвечаную творам беларускага паэта і публіцыста, вядомага журналіста, ганаровага грамадзяніна Полацка і Наваполацка, Навума Гальпяровіча. Сёлета Навум Якаўлевіч адзначыў сваё 70-годдзе.

Сумесны праект паэта і навучэнцаў студыі аб’яднаў адразу дзве музы – Паэзію і Мастацтва. У дзіцячых малюнках знайшлі сваё ўвасабленне лірычныя вобразы з вершаў Навума Гальпяровіча. Гэта і краявіды Полацка, яго старажытная і сучасная архітэктура, гістарычныя помнікі, якія захаваліся да нашых часоў, і, безумоўна, такія вядомыя землякі, як Францыск Скарына і Еўфрасіння Полацкая… З дапамогай педагога студыі выяўленчага мастацтва “Вясёлка” Таццяны Антановіч хлопчыкі і дзяўчынкі чыталі і слухалі вершы Навума Гальпяровіча, выбіралі з іх найбольш блізкі да сябе па настроі, а потым рупліва працавалі над малюнкамі. Вершы паэта натхнілі маленькіх мастакоў на вывучэнне гісторыі роднага краю. Падчас працы ў навучэнцаў студыі паўставалі розныя цікавыя пытанні: “Як выглядала школа Еўфрасінні Полацкай?”; “Як паэтычна перадаць у кампазіцыі “карункі графічныя дрэў”?”; “Як ззяла “сонейка ў касе Прадыславы”?”. Адказы на гэтыя пытанні можна знайсці на выставе “Малая радзіма. Мясціны, любыя сэрцу”, адчуць незвычайнае зачараванне старажытнага горада, подых гісторыі і непарыўнасць духоўных традыцый.

На выставе прадстаўлена больш за 20 малюнкаў, прысвечаных творчасці паэта Навума Гальпяровіча, а таксама іншыя творы навучэнцаў студыі – нацюрморты, творчыя кампазіцыі, копіі карцін знакамітых мастакоў, выкананыя ў розных тэхніках.

Выстава працягнецца да 9 верасня 2018 года.

Адрас: Кастрычніцкая плошча, 1 (Палац Рэспублікі),
галерэя “Універсітэт культуры”
327-26-12