Адкрыццё выставы “Метамарфозы шкла”

12 снежня 2012 г. а 16.00 у памяшканні музейна-выставачнага комплексу ДУ “Гісторыка-культурны музей-запаведнік “Заслаўе” (вул. Рынкавая, д. 4, г. Заслаўе) адбудзецца адкрыццё выставы “Метамарфозы шкла”.

Выстаўка  “Метамарфозы шкла” запрашае пазнаёміцца з рознымі відамі дэкаратыўных вырабаў з гэтага матэрыяла.

Гісторыя ўзнікнення мастацкага шкла звязана з гісторыяй ўзнікнення вытворчасці шкла ўвогуле.

Шкларобства на тэрыторыі Беларусі паўтарыла этапы развіцця вытворчасці шкла ўвогуле на зямлі.  Шкляныя вырабы, галоўным чынам упрыгожанні, вядомыя з часоў жалезнага веку, а ў Сярэднявеччы шкларобства было ўжо развітым рамяством, якое задавальняла патрэбы ў разнастайным, у тым ліку і мастацкім, шкляным посудзе. Яго мастацкім якасцям беларускія майстры ўдзялялі ўвагу не меншую, чым утылітарным. Многія формы посуду, выпрацаваныя яшчэ ў Сярэднявеччы, захаваліся і да нашага часу. Шкларобства ў Беларусі заўсёды адчувала ўплыў мясцовай традыцыйнай культуры. За доўгі і складаны шлях развіцця нашы продкі ў імкненні да прыгажосці  стварылі неацэнную мастацкую спадчыну, якая  вызначаецца нацыянальнай адметнасцю.  Лепшыя ўзоры шкларобаў мінулага сталі асновай для развіцця сучаснага мастацкага шкларобства.

Карціну мастацкага шкларобства вызначае не масавая прамысловая прадукцыя, а унікальныя творы станковага характару. У сапраўдны час мастакі шкла маюць неабмежаваныя магчымасці для ўвасаблення сваіх фантазій. У творах назіраецца імкненне да асацыятыўнай вобразнасці. Адыходзяць на другі план, альбо знікаюць зусім утылітарныя функцыі. Традыцыйныя формы непазнавальна мяняюцца, дапаўняюцца рознымі аздобамі. Работы мастакоў шкла напаўняюцца глыбокім філасофскім зместам, набываюць адметную ўнікальнась.