6 красавіка 2016 года а 17-ай гадзіне ў Літаратурным музеі Максіма Багдановіча адбудзецца адкрыццё літаратурна-дакументальнай выставы “Жаночым лёсам даражыць…” і ўрачыстае мерапрыемства Дзяржаўнага музея гісторыі беларускай літаратуры, прысвечаныя 70-годдзю з дня нараджэння пісьменніцы, перакладчыцы, літаратуразнаўцы Валянціны Міхайлаўны Коўтун.
Заняўшы пачэснае месца ў кагорце беларускіх творцаў, аўтар каля пяці зборнікаў паэзіі і вялікай колькасці празаічных твораў аддана і самаахвярна папулярызавала нацыянальныя здабыткі народа, адлюстроўвала асаблівасці характару знакамітых дзеячаў краіны, па-мастацку ўвасабляла вобраз жанчыны. Імя Валянціны Коўтун асацыюецца не толькі ў даследчыкаў літаратуры, але і ў чытачоў з глыбокай лірыкай пра ўнутраны свет дачкі, маці, бабулі. Апісанне непаўторнасці і ўнікальнасці жаночай душы, дзеянняў, учынкаў і памкненняў ў творах пісьменніцы мае як біяграфічны характар, так і аб’ектыўнае сузіранне, што дае падставы казаць пра выключнасць майстэрства і паэтычнага таленту аўтара.
Раманы “Крыж міласэрнасці” і “Пакліканыя” Валянціны Коўтун сталі яскравым прыкладам мастацкага асэнсавання дзейнасці Цёткі і Еўфрасінні Полацкай. І ўжо ў сучасныя дні творчая спадчыны самой аўтаркі заслугоўвае глыбокага аналізу і дасканалага асэнсавання.
На выставе, падрыхтаванай супрацоўнікамі музея, наведвальнік зможа глыбей пазнаёміцца з асобай Валянціны Коўтун, прасачыць яе жыццёвы шлях, ацаніць уклад творцы ў культурную скарбонку Беларусі. Фотаздымкі, рукапісы, кнігі і асабістыя рэчы дапамогуць раскрыць багатую на ідэі і памкненні Жанчыну з неўтаймаваным пачуццём нацыянальнай самасвядомасці.
У межах вечара ўспамінамі пра пісьменніцу падзеляцца сябры, паплечнікі па літаратурнай дзейнасці, прыхільнікі творчасці.
