“Кірмаш праектаў”: Прастора горада – прастора сімвалаў. Якіх?

Збор заявак на новы “Кірмаш праектаў” у Магілёве завершаны. І завершаны паспяхова!  Увечары 10 сакавіка ў антыкавярні “Чердак” будуць прадстаўленыя праекты, аб’яднаныя адной  тэмай: як палепшыць гарадскую прастору, зрабіць горад прывабным для турыстаў і для яго жыхароў, якое месца ў гэтым займае гісторыя і культура Магілёва.

“Кірмаш праектаў” адбудзецца ў Магілёве чацвёрты раз. Знаёмы фармат напоўніцца новымі ідэямі: за 5-6 хвілін “маланкавай размовы” аўтары  прапануюць сваё бачанне ўдасканалення прасторы Магілёва праз стварэнне новых або творчае пераасэнсаванне наяўных аб’ектаў: плошчаў, помнікаў, побытавых і арт-аб’ектаў. Праекты закрануць важныя пытанні каштоўнасцяў, якія шануюць магілёўцы, пытанні вонкавага і ўнутранага пазіцыянавання Магілёва:

• Мараль у гарадской прасторы. Ці ёсць табуяваныя тэмы, закрананне якіх можа паўплываць нават на нашыя звыклыя маршруты ў горадзе?
• Суседства і дарэчнасць помнікаў у гарадской прасторы. Якія гістарычныя даты, асобы вартыя ўшанавання ў Магілёве? Як правільна іх суадносіць адно з адным?
• Якія адметнасці Магілёва можна і трэба закладаць у аснову стварэння і развіцця буйных інфраструктурных праектаў?

Грамадская культурніцкая кампанія “Будзьма беларусамі!” запрашае ўсіх, хто гатовы паглядзець на свой горад новым позіркам, далучыцца да ўдзелу! “Кірмаш праектаў” адбудзецца 10 сакавіка ў антыкавярні “Чердак” па адрасе: вул. Ленінская, д. 7, 3 паверх. Пачатак: 19:00. Уваход вольны.

Даведкі:

www.budzma.by

8 (029) 319-93-09