У наступную нядзелю, 31 траўня, у музеі-дачы Васіля Быкава ў Ждановічах ладзяць літаратурна-мастацкі пленэр «Дачныя легенды».
Кожны ўдзельнік зможа паспрабаваць сябе ў ролі пісьменніка.
Падчас занятку ўзгадаюць асноўныя жанры і віды літаратуры, пагавораць пра іх асаблівасці, пазнаёмяцца са структурай літаратурнага твора. А каб настроіцца на творчы лад, пагуляюць у цікавую літаратурную гульню.
А пасля – самае цікавае!
Кожны ўдзельнік створыць невялікі літаратурны твор ад імя адной з рэчаў, прадстаўленых у экспазіцыі Музея-дачы Васіля Быкава.
Гэтыя прадметы належалі народнаму пісьменніку Беларусі Васілю Быкаву і яго сям’і.
Прапануюць «ажывіць» рэчы, прымусіць іх загаварыць і раскрыць нам таямнічыя гісторыі, сведкамі якіх яны былі.
Аўтары найлепшых твораў атрымаюць магчымасць убачыць свае працы надрукаванымі ў часопісе «Маладосць».
Працягласць – 2 гадзіны.
Удзел – 10 рублёў. Запісвайцеся па нумары +375 29 811 21 85.
Да музея зручна даехаць аўтобусам №345 ад ст. м. «Пушкінская».