Літаратурная вечарына “Не знікай…” да юбілею Алеся Пісьмянкова

24 лютага ў Літаратурным музеі Максіма Багдановіча адбудзецца  мерапрыемства Дзяржаўнага музея гісторыі беларускай літаратуры “Не знікай…”, прымеркаванае да юбілею Алеся Пісьмянкова.

Алесь Пісьмянкоў нарадзіўся 25 лютага 1957 года ў вёсцы Бялынкавічы на Магілёўшчыне багатай на паэтычныя таленты. Скончыў філалагічны факультэт БДУ. Працаваў у газеце “Літаратура і мастацтва”, часопісах “Полымя” і “Вожык”. Пяру Алеся Пісьмянкова належаць кнігі паэзіі “Белы камень”, “Чытаю зоры”, “Планіда”, “Вершы”, “Журавель над студняй”, “” Я не памру пакуль люблю”, “Мы з братам”, “Думаць вершы: вершы, эсэ, успаміны”, “Не знікай: вершы, эсэ”(дзве апошнія выйшлі пасля смерці паэта).

Ён пайшоў з жыцця маладым, поўны сіл і творчых задум. Яго шчырае і шчодрае сэрца спынілася раптоўна ў 2004 годзе. Нам засталіся яго вершы светлыя, пранікнёныя і шчырыя…  Засталіся цёплыя ўспаміны родных і сяброў, яго знакамітае “Не знікай…” – так ён казаў сябрам на развітанне, выказваючы спадзяванне на новыя сустрэчы. Глыбокая і шматгранная творчасць Алеся Пісьмянкова пакідае надзею на тое, што яго паэзія будзе знаходзіць водгук у сэрцах чытачоў пакуль на зямлі будуць існаваць такія паняцці як Радзіма, Сумленне, Вернасць, Каханне.

На імпрэзе ў вас будзе магчымасць:

• даведацца пра цікавыя факты з жыцця пісьменніка;
• натхніцца творамі паэта;
• пачуць успаміны тых, хто ведаў творцу;
• пазнаёміцца з прэзентацыяй, прысвечанай паэту.

Месца правядзення: Літаратурны музей Максіма Багдановіча

(вул. М. Багдановіча, 7а).

Кантактны тэлефон: (017) 334-56-21.

Куратар мерапрыемства: загадчык культурна-адукацыйнага аддзела Лідзія Шагойка.