Наіўна. Супер: Размова з нарвежскім пісьменнікам Эрлендам Лу
Пачатак: 18.04 (19:00)Канец: 18.04 (19:00)
Iвэнт-прастора Space
18 красавіка ў Мінску ў межах кінафестывалю «Паўночнае ззянне» у івэнт-прасторы Space (вул. Кастрычніцкая, 16А) адбудзецца сустрэча з нарвежскім пісьменнікам Эрлендам Лу. Пачатак у 19.00. Уваход вольны.
Пагаворым пра скандынаўскую і нарвежскую літаратуру, досвед Эрленда Лу ў працы над дзіцячай літаратурай, наiўны стыль пісьма ў літаратуры для дарослых, досвед працы над кінасцэнарыямі. А таксама пра тое, як не пасварыцца з кінарэжысёрамі, якія патэнцыйна могуць узяцца за твой кінасцэнарый, працуючы ў штодзённай нарвежскай газеце Adresseavisen кінакрытыкам.
Мадэратарка: Воля Чайкоўская
Размова адбудзецца на ангельскай мове з паслядоўным перакладам на беларускую.
Эрленд Лу, пісьменнік, кінакрытык, Нарвегія
Сучасны нарвежскі празаік, кiнакрытык, сцэнарыст. Скончыў Дацкую кінаакадэмію, працуе культурным і кінааглядальнікам у штодзённай нарвежскай газеце Adresseavisen.
Да гэтага працаваў школьным настаўнікам, перакладчыкам і санітарам у лякарні для псіхічна хворых, здымаў відэакліпы, кароткаметражныя фільмы.
Жыве ў Осла і працуе ў якасці пісьменніка, кінасцэнарыста і перакладчыка.
Дэбютным раманам Эрленда Лу, які прынёс яму вядомасць, быў «Ва ўладзе жанчыны», у якім Лу апісаў неўзаемнае каханне маладога нарвежца. Фільм быў экранізаваны нарвежскім рэжысёрам Петэрам Несам у 2007 г. і быў вельмі пасьпяховым ў нарвежскіх кінатэатрах. У фільмаграфіі Лу таксама сцэнарый да фільма «Поўнач» (рэж. Рэнэ Дунстад Ланглу). Адной з самых вядомых дзіцячых кніг Лу з’яўляецца «Курт, куды ты ідзеш?», за яе пісьменнік атрымаў шэраг узнагарод, як і за іншыя свае кнігі. Раман «Найлепшая краіна ў свеце» – пра Фінляндыю, адзін з найпапулярнейшых сярод кніг Эрленда Лу.
Самая знакамітая кніга Эрленда Лу «Наіўна. Супер» перакладзеная ўжо больш чым на 20 моваў свету.
Паводле прэс-рэлізу
