Полацк. Прэзентацыя-дыскусія “Беларуская культура – прастора выбару?”
Пачатак: 25.10 (08:00)Канец: 25.10 (17:00)
Музей беларускага кнігадрукавання
Культурніцкія, грамадскія, творчыя дзеячы, ініцыятывы і арганізацыі Полацка і Наваполацка запрашаюцца 25 кастрычніка на незвычайную дыскусійную сустрэчу, якая дасць магчымасць пазнаёміцца з двума цікавымі праектамі для прафесіяналаў у сферы культуры.
ГА “Цэнтр еўрапейскай трансфармацы” супольна з міжнародным кансорцыюмам “ЕўраБеларусь” (Мінск) запрашаюць на падвоеную прэзентацыю:
1) Прадстаўленне вынікаў “Маніторынгу рэалізацыі ў Рэспубліцы Беларусь “Канвенцыі ЮНЕСКА аб ахове і заахвочванні разнастайнасці форм культурнага самавыражэння” – зробленага летась камандай “ЦЕТ” першага сістэмнага аналізу сферы культуры Беларусі, які дае ўяўленне аб культурнай палітыцы краіны ў сучасным еўрапейскім кантэксце.
Акрамя ўласна вынікаў даследвання, эксперты “ЦЕТ” Тацяна Вадалажская і Андрэй Ягораў прапануюць абмеркаванне перспектываў новых падыходаў у культурнай палітыцы Беларусі. Культура як сфера нашага ўплыву: хто і як мусіць фармаваць беларускую культуру сёння? – цэнтральнае пытанне запланавай дыскусіі.
2) Знаёмства з магчымасцямі міжнароднага праекта “CHOICE” (Cultural Heritage: Opportunity for Civic Engagement), які будзе разгортвацца ў Беларусі, Украіне, Арменіі і Малдове ў бліжэйшыя два гады. Беларуская частка праекту, “СHOICE-Беларусь: спадчына і сучаснасць”, ставіць мэтамі пераасэнсаванне, ахову і аднаўленне матэрыяльнай і нематэрыльянай культурнай спадчыны Беларусі сіламі грамадзянскай супольнасці. Каардынатары праекта шукаюць недзяржаўныя культурніцкія арганізацыі, ініцыятывы, творцаў і даследчыкаў, якія падзяляюць гэтыя каштоўнасці, а таксама гатовыя актыўна працаваць і на развіццё сваіх прафесійных кампетэнцый.
Абедзве прэзентацыі, самастойныя па змесце, закранаюць пытанні штодзённага выбару, які мы робім як разнастайныя гульцы на культурніцкім полі краіны: што ўваходзіць у сферу нашага уплыву на ўласную культуру і якія з магчымасцяў мы выкарыстоўваем? Да абмеркавання запрашаюцца ўсе, хто сапраўды шукае адказы.
Месца правядзення: г. Полацк, Музей беларускага кнігадрукавання, вул. Ніжне-Пакроўская, 22.
25 кастрычніка. Пачатак: 14:00.
Для даведак:
– ГА “ЦЕТ” (“Цэнтр еўрапейскай трансфармацыі”) – , незалежны беларускі аналітычны цэнтр (think tank), заснаваны ў 2010 годзе ў Мінску. Уваходзіць у структуру міжнароднага кансорцыюма “ЕўраБеларусь”
– МК “ЕўраБеларусь” – аб’яднанне беларускіх і еўрапейскіх недзяржаўных арганізацый, дзейнасць якіх факусуецца на агульных задачах: умацаваннё і развіцця сферы публічнай палітыкі (public policy) у Беларусі з актыўным удзелам грамадзянскай супольнасці; арганізацыйнае развіццё прадстаўнікоў грамадзянскай супольнасці, іх актыўны і ўсвядомленае удзел у працэсах дэсаветызацыі, беларусізацыі і еўрапеізацыі.
