Прэм’ера спектакля «Мая мама ў турме» ў Беластоку
20.02.2025
17:00 - 21:00
Centrum Kulturalne w Dobrym Tonie (ul. Legionowa 30)
Бясплатнае
У чацвер, 20 лютага, у Беластоку адбудзецца прэм’ера спектакля «Мая мама ў турме».
Ён пастаўлены паводле кнігі Вольгі Вялічка пра жыццё, мары і казкі дзяцей палітвязняў.
Два гады таму псіхалагіня Вольга Вялічка, якая працуе з дзецьмі палітзняволеных, пачала збіраць апавяданні аб тым, як яны перажылі гэты складаны этап — спачатку ператрусы дома, потым затрыманне бацькоў, прычым часам абодвух, і іх заключэнне.
Дзеці расказвалі, якія ім сняцца сны і якія яны прыдумляюць казкі, каб перажыць траўму, а яшчэ — пра што яны мараць.
Іх досвед параўноўваецца ў спектаклі з гісторыямі жанчын і дзяцей, рэпрэсаваных у савецкі час у жаночым лагеры АЛЖЫР (Акмалінскі лагер жонак здраднікаў радзімы, які існаваў да 1953 года ў Казахстане).
Былыя акторы Гродзенскага драматычнага тэатра, якія пасля пратэстаў былі вымушаны пакінуць Беларусь, разам з калегамі са Старога Віленскага тэатра паставілі на аснове кнігі спектакль.
У пастаноўцы задзейнічаны дзеці, якія займаюцца ў тэатральнай школе «Разам» і таксама не могуць вярнуцца на радзіму.
Рэжысёрка — Наталля Лявонава.
Спектакль ідзе на беларускай мове з перакладам на польскую мову субтытрамі.
Уваход вольны. Рэгіструйцеся на сайце dobryton.org альбо праз смс на нумар 507760601.
