Выстава беларускага мастацтва «Калі сонца нізка — цені доўгія» ў Лейпцыгу

10 чэрвеня ў Лейпцыгскай галерэі сучаснага мастацтва адкрываецца выстава беларускіх мастакоў «Калі сонца нізка — цені доўгія». 

Дата: з 10 чэрвеня па 25 верасня

Месца: Galerie für Zeitgenössische Kunst (GfZK), Karl—Tauchnitz-Straße 9–11, Лейпцыг

У экспазіцыі:

Аляксандр Адамаў, Ірына Ануфрыева, Bazinato, Ян Гелда, Жанна Гладко, Сяргей Гудзілін, Эвеліна Домніч / Дзмітрый Гельфанд, Язэп Драздовіч, Захар Кудзін, Сяргей Лескець, Маша Мароз, Алёна Пазднякова, Ала Савашэвіч, Вольга Сазыкіна, Ганна Сакалова, Антон Сарокін, Маша Святагор, Уладыслаў Стшэміньскі, Сяргей Шабохін, Юра Шуст.

Куратарка — Ганна Карпенка.

Выстава «Калі сонца нізка — цені доўгія» прадстаўляе вобраз гістарычнага і сучаснага кантэксту беларускага мастацтва, раскрываючы сувязі між глыбока архаічнай прыродай чалавека ў сацыяльным, палітычным і культурным вымярэннях і нясмелым жаданнем разарваць заганнае кола рэпрэсіўных рэжымаў і іх сістэм.

Філосаф Ігар Бабкоў апісаў Беларусь як «каралеўства руінаў», спасылаючыся на гісторыю заняпаду і сіроцтва, спалучаную з незвычайным багаццем гэтага месца, якое так часта называюць «terra incognita» Еўропы. «Руіны» вызначаюць межы вяртання любой цывілізацыі да «Прыроды».

Цені мінулага выяўляюцца прадвеснікамі нашых спробаў інтэрпрэтаваць, візуалізаваць і ўхапіць след часу, спакутаванага адсутнасцю і пераследам. Чым даўжэйшыя цені, тым меншыя нашы шанцы спазнаць праўду пра рэчы, што іх адкідаюць.