Выстава Веранікі Віткоўскай і Рыгора Віткоўскага «Падарожжа ў лета» ў Мінску

У чацвер, 11 чэрвеня, у галерэі Шчамялёва адкрываецца выставы графікі мастакоў Веранікі Віткоўскай і Рыгора Віткоўскага (1923 — 1992) «Падарожжа ў лета».

Выстаўка прэзентуе станковую графіку двух пакаленняў сям’і Віткоўскіх — мастачкі-манументалісткі, Веранікі Віткоўскай і яе бацькі, класіка савецкай і беларускай графікі Рыгора Віткоўскага.

Вераніка Віткоўская пачынала свой творчы шлях, працуючы са шклом. Цяпер яна больш вядомая як жывапісец з яркай мастацкай мовай, якая адрозніваецца дэкаратыўнасцю, смелымі каларыстычнымі спалучэннямі, шырокай і экспрэсіўнай манерай выканання.

Асноўны тэматычны напрамак яе творчасці — гэта нацюрморт і пейзаж, якія апяваюць прыгажосць навакольнага свету.

На выставе прадстаўлены графічныя эцюды і кампазіцыі спадарыні Веранікі, выкананыя ў розных тэхніках рознымі матэрыяламі.

У экспазіцыю ўвайшлі працы розных гадоў, пачынаючы з канца 1980-х гадоў. Усё гэта дазваляе прасачыць, як мяняўся і складваўся стылістычны почырк мастачкі.

Вераніка Віткоўская шмат увагі надае захаванню і папулярызацыі творчасці свайго бацькі, Рыгора Антонавіча Віткоўскага, які найперш вядомы як адзін з заснавальнікаў класічнага траўленага афорту ў Беларусі. Аднак не меншую цікавасць уяўляюць акварэлі, пастэлі і малюнкі, якія адкрываюць яго як майстра лірычнага пейзажа, які займаў асноўнае месца ў яго творчасці канца 1960-1970-х гадоў.

У экспазіцыю ўвайшла толькі малая частка з графічных серый.

У экспазіцыі выставы прадстаўлена больш за 50 работ Веранікі Віткоўскай і Рыгора Віткоўскага.

Выстава працягнецца па 9 жніўня.