Праект асветніцкіх сустрэч-семінараў “Забаўлянкі для Янкі” Студэнцкага этнаграфічнага таварыства (СЭТ) “Поўнач” цягам года збіраў у нашым горадзе бацькоў і дзетак, неабыякавых да беларушчыны, ахвочых выхоўваць малечаў на мове і паводле беларускіх традыцый.
Дыск “Калыханкі для Янкі”, які выйшаў днямі, — своеасаблівая справаздача пачынальнікаў і куратараў праекта. Тут сабраныя калыханкі, забаўлянкі, гушкалкі і казачкі з розных куткоў Беларусі. Спявалі і чыталі для дыска самі дзяўчаты і хлопцы з СЭТа. Выданне дыска зрабілася магчымым дзякуючы падтрымцы грамадскай культурніцкай кампаніі “Будзьма беларусамі!”. Дыск мае зрабіцца дапаможнікам для бацькоў, якія хацелі б, каб іхнае дзіця чула родную мову і лёгка разумела яе. Цяпер залюляць малога, пагуляцца з ім ці зацікавіць казачным сюжэтам можна будзе і па-беларуску.
Прэзентацыя кружэлкі “Калыханкі для Янкі” адбудзецца 8 ліпеня (аўторак) у 18.30 у выставачнай зале “Задзвіння” (вул. Чайкоўскага, 3). Уваход вольны. Гасцей чакаюць сюрпрызы, пачастункі і падарункі. Будзьма расці беларусікамі!
