“Кірмаш праектаў” для “Культурнай сталіцы СНД і Беларусі – 2013” прайшоў ў Магілёве. Ініцыяваны грамадскай культурніцкай кампаніяй “Будзьма беларусамі!” і падтрыманы аддзелам культуры Магілёўскага гарвыканкама, праект меў на мэце вынайсці цікавыя і запатрабаваныя ідэі, якія змаглі б узбагаціць жыццё абласнога горада, што здабыў высокі статус. Упершыню ў найноўшай гісторыі Беларусі абмеркаванне прапановаў адбылося ў фармаце грамадскай дыскусіі.
Ніна Шыдлоўская, каардынатар кампаніі “Будзьма беларусамі!”
намесніца кіраўніка аддзела культуры Магілёўскага гарвыканкама Ірына Жабарава
У вітальным выступе намесніца кіраўніка аддзела культуры Магілёўскага гарвыканкама Ірына Жабарава зазначыла, што такая сустрэча – не толькі магчымасць палепшыць праекты па ўжо запланаваных кірунках культурніцкай дзейнасці, але і прыняць новыя: “Мы меркавалі, што грамадскасць прачнецца і выкажа сваё бачанне. Менавіта таму “Кірмаш праектаў” уключаны ў план мерапрыемстваў культурнай сталіцы”.
На сённяшні момант у плане ужо ёсць 9 зацверджаных кірункаў, але калі новыя праекты пададуцца цікавымі, горад не выключае сваёй падтрымкі. А выбраць і падтрымаць ёсць з чаго: 15 прадстаўленых праектаў закранулі самыя розныя бакі ў сацыякультурным жыцці горада (ад патрыятычнага графіці ды вершаў беларускіх паэтаў у грамадскім транспарце да алеяў памяці і абароны помнікаў гісторыі). Да канца тыдня арганізатары сустрэчы абяцаюць прадэманстраваць праекты на сваіх рэсурсах у інтэрнэце.
Паводле прызнання Ніны Шыдлоўскай, каардынатара кампаніі “Будзьма беларусамі!”, сустрэча стала здзяйсненнем адной з мараў – “аб’яднаць нарэшце намаганні творцаў, грамадскіх арганізацый, адпаведных дзяржаўных органаў, каб пашыраць беларускую культуру ва ўсіх яе праявах”. Менавіта ў Магілёве адбылося першае ток-шоу з серыі “Культура паляпшае жыццё”, таму і першае грамадскае абмеркаванне праектаў выглядае тут цалкам лагічна і мусіць стаць прыкладам для ўсёй краіны.
На прэзентацыю сваіх працаў кожнаму ўдзельніку давалася 5 хвілін, пасля чаго аўтары адказвалі на пытанні залы. У фінале мерапрыемства пры дапамозе спецыяльных апытанак гледачы маглі адзначыць усе праекты па дзесяцібальнай шкале ў катэгорыях “Актуальнасць”, “Унікальнасць” і “Магчымасць рэалізацыі”. Гэтыя рэкамендацыі будуць улічаныя, калі калегіі падвядуць канчатковыя вынікі “Кірмашу”. Сайт Магілёўскага гарвыканкама паведамляе пра адметнасць і магчымае ўключэнне ў праграму “Культурнай сталіцы” пяці праектаў “Кірмашу” .
Віталь Ругайн, вядоўца
Руплівая праца рэгіянальнага каардынатара “Будзьма беларусамі!” Юрася Стукалава па арганізацыі адкрытых прэзентацый стала моцным падмуркамдля далейшага канструктыўнага дыялогу ў грамадстве. Магілёў ужо атрымаў сертыфікат “культурнай сталіцы краінаў СНД і Беларусі”, і фармаванне культурніцкай праграмы пераходзіць у актыўную фазу. Прыклад грамадскай дыскусіі і “Кірмашу праектаў” зацікавіў і Гомель, дзе нядаўна адбылася першая грамадская сустрэча. Адкрытыя прэзентацыі ў абласных цэнтрах пройдуць неўзабаве.
Алесь Плотка, PR-мэнэджар кампаніі “Будзьма беларусамі!”, фота – Аляксандр “Tarantino” Ждановіч
