Калі вы раптам яшчэ не вызначыліся, як цікава і з карысцю правесці выходныя, мы падкажам. Джаз у Гародні, фэст нямога кіно ў Брэсце, васільковы плэнер на лецішчы Быкава, а яшчэ тэатральныя прэм’еры, гістарычныя фестывалі, канцэрты — выбірайце мерапрыемствы ў сваім горадзе і на свой густ!
Беларусь
Мінск і Мінская вобласць
Васільковы пленэр у музеі-дачы Васіля Быкава пад Мінскам
20 жніўня ў музеі-дачы Васіля Быкава ў Ждановічах зноў ладзяць мастацкі васільковы пленэр! Тэматыка — адлюстраванне вобразаў Васіля Быкава праз наіўнае (інсітнае) мастацтва. Для вас правядуць экскурсію па музеі, а пасля пад шатамі славутых «быкаўскіх» бяроз пройдзе майстар-клас па роспісе сумак-шопераў у стылі беларускай маляванкі.
У суботу, 19 жніўня, у Музеі народнай архітэктуры і побыту ў Азярцы адсвяткуюць Мядовы, Яблычны і Хлебны Спас!
Нашыя продкі верылі, што асвечаны мак меў уласцівасць абараняць ад ведзьмаў, а святая вада была гаючай: пра народныя прыкметы і традыцыі на Спас вы і даведаецеся на свяце. Таксама ў Азярцы можна будзе далучыцца да беларускіх танцаў ды гульняў і асвяціць яблыкі, мёд, хлеб і зерне.
Віцебская вобласць
Фэст славянскай міфалогіі «Шлях Цмока»
У цэнтральнай сядзібе Бярэзінскага запаведніка 19 і 20 жніўня пройдзе чацвёрты фестываль, прысвечаны нашым міфам і легендам. Беларускі Цмок і яго світа чакаюць вас ва ўнікальным месцы ў кампаніі таямнічых істот славянскай міфалогіі! У праграме:
- навуковыя лекцыі і дыспуты ад слынных знаўцаў беларускай міфалогі;
- шаманская лакацыя і этнічнае танцавальнае шоу ад студыі этнапластыкі «Кетры/Ketri» фестывальны квэст;
- open-air беларускіх гуртоў;
- і гэта — толькі невялікая частка імпрэз, якія для вас падтрыхтавалі на фестывалі!
Гродзенская вобласць
20 жніўня ў дворыку Музея гісторыі рэлігіі пройдзе заключны канцэрт серыі летніх джазавых вечарын Jazz & Family Grodno Summer 2023. На фінал абяцаюць надзвычайны канцэрт аўтарскай музыкі скрыпача Карэна Карапецяна.
Таксама для вас зайграюць: Андрэй Ускоў (гітара), Ігар Бранкоўскі (клавішы), Вячаслаў Сяргеенка (бас), Ілля Сцяпанаў (барабаны).
Крэва
У суботу, 19 жніўня, у Крэве збяруцца аматары гістарычных падарожжаў, рыцарскіх забаў і народных песень. Ад 14.00 і да самай поўначы на пляцоўках перад брамай Крэўскага замку і ў яго ўнутраным дворыку можна будзе паглядзець на фестываль-кірмаш керамістаў, паслухаць канцэрты з удзелам фолк-гуртоў, паўдзельнічаць у майстар-класе па сярэднявечных танцах, схадзіць на аглядную экскурсію «Гістарычнае Крэва», і гэта — толькі невялічкая частка імпрэз, якія будуць адбывацца на фэсце.
Гомельская вобласць
Яблычны спас у Неглюбцы
У суботу, 19 жнўіня, Веткаўскі музей запрашае ў Неглюбку на імпрэзы ткацкага летніка. На сам летнік вольных месцаў ужо няма, але ж у апошні святочны дзень да актыўнасцяў можа далучыцца кожны ахвотны. Глядзіце, колькі ўсяго будзе:
- наведванне святочнай службы на «Спаса» ў Мікольскай царкве, асвячэнне яблыкаў і мёду (служба пачынаецца а 8-й раніцы);
- абраканне ля крыніцы;
- святочны абед;
- лекцыя-практыкум «Каляндар традыцыйнага ткацтва»;
- традыцыйныя танцы пад гармонік.
Брэст
Напрыканцы тыдня ў Брэсце адбудуцца паказы фэста нямога кіно і сучаснай музыкі КІНЕМО. Да паказаў штораз ствараюць арыгінальнае музычнае суправаджэнне і прэзентуюць яго ўжывую ў фармаце перформансаў, якія аб’ядноўваюць у сабе кінапаказ і музычны канцэрт.
У суботу, 19 жніўня, убачым фільм «Рукі Орлака» Роберта Вінэ.
Піяніст Орлак страчвае свае рукі падчас катастрофы на чыгунцы. Яму перасаджваюць новыя: некалі яны належалі забойцу. У Орлака з’яўляецца адчуванне, што яны цягнуць яго на здзяйсненне злачынстваў...
Польшча
Варшава
Народзіны Юрыя Стыльскага ў Варшаве
19 жніўня (у суботу) гурт «Дай дарогу» і асабіста Юры Стыльскі з нагоды сваіх народзінаў грае вялікі электрычны канцэрт у Варшаве. Абяцае зорных гасцей! (Трымае ў сакрэце, хто! Таму трэба ісці-))
Беларускамоўны дзіцячы спектакль «Угу! Навіны лесу» ў Варшаве
У суботу, 19 жніўня, беларускі Тэатр_безназвы разам з тэатральнай ініцыятывай «Дзея другая» ладзіць у Варшаве прэм’еру дзіцячага лялечнага спектакліка «Угу! Навіны лесу» на беларускай мове.
Інакшасць і непаразуменне — гэта тое, з чым беларускім дзеткам прыходзіцца сутыкацца ў эміграцыі. Разабрацца ў пытанні дапамогуць Пугач і Вавёрка. Вас чакае ўтульная гісторыя пра тое, як пераадольваць складаныя сітуацыі і спрабаваць сябраваць з тымі, хто лічыць цябе ворагам.
Уроцлаў
Алесь Лютыч (:B:N:)
У суботу, 19 жніўня, ва Уроцлаве грае канцэрт лідар гурта :B:N: Алесь Лютыч. Рыхтуйцеся да драйвовага міксу рока, лірыкі, моцнага і ў той самы час меладычнага вакалу.
Аўстрыя
Вена
KOOB у Вене!
У суботу, 19 жніўня, беларуская соўл-прынцэса Валерыя Дэле з сольным электронным праектам KOOB грае канцэрт у Вене! Вас чакае мікс джазу, авангарду і соўла, сучаснасці і традыцыі, памножаных на па-сапраўднаму цікавы вайб, бездакорны стыль і вялікі досвед.
Склад:
KOOB — Вакал (BY)
Lenny Rehm — Барабаны (DE)
Oto Gvardjancic — Клавішы (DE)
Jarrah Dhyan — Гітара (AU)
Seth Sjöström — Электра-бас (SE)
Больш беларускіх падзей шукайце ў нашай Афішы.
Калі сярод прапанаваных варыянтаў не знайшлося нічога па душы, раім выправіцца ў вандроўку па Беларусі. Скласці цікавы маршрут дапаможа наша рубрыка «Вандруем разам».
Каб не прапусціць нічога цікавага, раім падпісацца на адмысловы тэлеграм-бот «Будзьма разам!», які дапамагае падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!
А па гэтай спасылцы можна знайсці афішу бясплатных мерапрыемстваў. Больш беларускіх падзей шукайце ў нашай Афішы.