“Больш цела. Як прыняць сябе?” — сустрэча пад такой назвай прайшла ў барысаўскім цэнтры моладзевых ініцыятыў “Ступени”. Гендарная актывістка Маша Колб у межах праекта "Маё права" распавяла падлеткам пра бодзіпазітыў і пра тое, як навучыцца прымаць сваё цела і целы іншых людзей такімі, якія яны ёсць.
Маша Колб
Вашай увазе — асноўныя тэзісы сустрэчы:
Бодзіпазітыў — фемінісцкі рух, які распачаўся больш за сто гадоў таму з пратэстаў суфражыстак супраць гарсэтаў.
Бодзіпазітыў не заклікае лайдачыць на канапе. Адна з яго галоўных ідэй — чалавек сам выбірае, як павіннае выглядаць яго цела. Калі яму камфортна, ніхто не мае права асуджаць яго выбар.
Бодзіпазітыў — слухаць і чуць сваё цела
Бодзіпазітыў імкнецца да паважлівага ўспрыняцця любога выгляду, у тым ліку змененага з прычыны хваробы, траўмы альбо асабістага рашэння.
Ніхто не мае права дыктаваць, як павіннае выглядаць наша цела. Асабліва гэта тычыцца карпарацый фэшн-індустрыі, якія такім чынам зарабляюць грошы: нашмат зручней падагнаць усе целы пад адзін стандарт, чым адшываць адзенне на розныя памеры.
Прыняцце свайго цела складаецца з самапавагі, эмацыйнай стабільнасці і пазітыўнага стаўлення. Трэба шанаваць сябе, падтрымліваць здаровую сувязь паміж думкамі і пачуццямі. Радавацца целу, але не зацыклівацца на ім.
Чым больш крытыкуеш знешнасць іншых людзей, тым больш з’яўляецца прэтэнзій да сябе. Калі разумееш, што ўсе людзі могуць выглядаць як хочуць — пачынаеш спакойней ставіцца да сваёй знешнасці.
Жанчына нікому нічога не павінная. Яна не павінная сядзець на дыетах, хацець схуднець ці есці адны салацікі. Калі чалавек побач кантралюе, што і колькі ты ясі, гэта эмацыйны гвалт і трэба хутчэй заканчваць адносіны.
Калі ўвесь час кантраляваць ежу, можа пачацца разлад харчовых паводзінаў (РХП): нервовая анарэксія, нервовая булімія альбо кампульсіўнае пераяданне (прыступы абжорства). Усе гэтыя захворванні — псіхічныя, да іх могуць прывесці негатыўныя рэчы, якія адбываюцца ў нашым жыцці.
Гендарныя актывісткі праекта “Больш цела” распрацавалі буклет, які распавядае пра РХП. Ён змяшчае інфармацыю пра гэтыя хваробы, а таксама парады, што рабіць, калі побач чалавек з РХП, якая дапамога ёсць у Беларусі. Паглядзець альбо спампаваць, буклет можна тут.
Парады, як прыняць сябе:
Знайдзіце ў сабе якасці, вартыя павагі, і ніколі пра іх не забывайце. Можна выпісаць іх на аркуш і звяртацца да спіса ў цяжкія моманты.
Больш камунікуйце з добрымі, пазітыўнымі, прыязнымі людзьмі. Самі выбірайце сваё атачэнне — людзей, якія не абясцэньваюць ці папракаюць неадпаведнасцю пэўным стандартам, але паважаюць, падтрымліваюць і любяць.
Не разглядайце сябе па частках, але ўспрымайце цалкам, як цэласную асобу.
Вось колькі практыкаванняў, каб лепш зразумець сябе і свае адносіны з целам. Паспрабуйце тыдзень не карыстацца люстэркам. Так вы зможаце паглядзець на сябе з іншага боку, і, адпаведна, лепш зразумець. Ці, наадварот, калі вы застаяцеся адны дома, часцей спыняйцеся перад люстэркам, разглядайце сябе ў адзенні ці без яго: як вы адчуваеце сябе, свае цела, як яно знаходзіцца ў прасторы?
Апранайцеся так, каб вам было зручна, насіце адзенне вашых памераў.
Радуйце сябе. Знаходзьце час, каб зрабіць тое, што прыносіць вам задавальненне: з’есці торцік, паляжаць у ванне, пачытаць.
Стаўцеся крытычна да фота, якія размяшчаюцца ў СМІ і сацыяльных сетках. Збольшага яны апрацаваныя фаташопам, у рэальным жыцці так выглядаць амаль немагчыма.
Люстэрка дыктуе. Ці можна купіць тое, што прадаюць сучасныя трэнды?
Чытайце добрыя кнігі кшталту “Міф аб прыгажосці” Наомі Вульф, глядзіце актуальныя серыялы, прыкладам, “Дзяўчаты” Ліны Данэм. Увогуле, калі ведаеце англійскую — вам адкрыты доступ да сусветнай базы інфармацыі па бодзіпазітыве.
Маша Колб — выпускніца гендарнай канцэнтрацыі ECLAB. Разам з каляжанкай Лізаветай Мімікавай у ліпені 2019 года заснавала жаночую ініцыятыву “Больш цела!”. З дапамогай праекта гендарныя актывісткі распавядаюць пра ідэі бодыпазітыву, сэксуальнасць, цялеснаць, разлад харчовых паводзінаў.
Аляксандра Дварэцкая
Фота — Зарына Кандрацьева
Сачыце за нашымі публікацыямі ў Telegram, Facebook, Вконтакте ды Twitter! А ў нашым Instagram вас чакаюць яскравыя фота!