Сумесны праект пад назвай “Будзьма з мовай!”, арганізаваны кампаніяй “Будзьма беларусамі!” і Беларускай лігай інтэлектуальных каманд, прайшоў 10 жніўня 2012 у летніку “Купалінка” для юніёраў і ювеналаў гульні. Цягам дня прызы ад “Будзьма!” разыгрываліся ў інтэлектуальных гульнях “Медыя-альфабэт” і “Што? Дзе? Калі?” з пытаннямі па-беларуску. Адбыліся таксама выступы беларускіх паэтаў і музыкаў і беларуская дыскатэка.
Кубак Цмока
Яўген Зайцаў, вядоўца гульні і адзін з аўтараў пытанняў, так пракаментаваў свае чаканні ад Дня беларускай мовы: “Не ведаю, добра гэта ці не, але дзеці, якія займаюцца інтэлектуальнымі гульнямі і прыязджаюць у летнік БЛІК, думаюць пра сябе як пра інтэлектуальную эліту краіны. Я быў бы вельмі ўдзячны лёсу, калі б атрымалася далучыць да гэтага пераканання адзін пункт: права адносіць сябе да інтэлектуальнай эліты ўключае ў сябе і абавязак ведаць родную мову”.
45 камандаў з удзельнікамі, што з’ехаліся ў летнік з усёй Беларусі, змагаліся за прызы і сувеніры ад кампаніі “Будзьма беларусамі!”. Пытанні датычылі не толькі сусветнай культуры, але і сваёй краіны і яе культуры; так, напрыклад, трэба было адказаць, каму, згодна з беларускімі паданнямі, гаспадар хаты быў абавязаны ставіць на даху ці на гумне патэльню яечні.
А калі вы здагадаліся, што цмоку, можна было паспрабаваць здагадацца, чаго, на думку каардынатара кампаніі “Будзьма беларусамі!” Алены Макоўскай, беларускаму цмоку як новаму турыстычнаму сімвалу пакуль не хапае. Толькі самыя здагадлівыя маладыя знаўцы далі правільны адказ – “імені”.
Цмокі лятуць на выступ
За шаснаццацігадовую гісторыю існавання летніка Беларускай лігі інтэлектуальных каманд ужо арганізоўвалася некалькі выступаў беларускіх літаратараў. Паэта Андрэя Хадановіча, які і сам быў знаўцам “Што? Дзе? Калі?”, заўсёды чакаюць у летніку. Гэтым разам маладым інтэлектуалам свае творы прадставілі Антон Рудак, Андрэй Адамовіч, Павал Касцюкевіч, Марыя Мартысевіч, Віталь Рыжкоў і Яўген Барышнікаў. А перад імпрэзай паэтка Марыя Мартысевіч, калісьці сама ўдзельніца летніка БЛІК, уручыла пераможцам турніру прызы ад кампаніі “Будзьма беларусамі!”
Скончыўся дзень “Будзьма з мовай!” амаль двухгадзіннай дыскатэкай з музычнай часткай, на 100% складзенай з беларускамоўных кампазіцый.
Паводле сумы ўражанняў было вырашана працягваць традыцыю беларускіх дзён “Будзьма з мовай!” у летніку БЛІК і ў будучыні.
Рыгор Скабічэўскі, фота – Юрась Строк
