Першы ў Беларусі чэмпіянат па паяданні сэндвічаў на хуткасць прайшоў у адной са сталічных піцэрый.
Рэкардсменам і ўладальнікам 500 тысяч рублёў стаў заўсёднік піцэрыі Зміцер Мініч, які прыйшоў з групай падтрымкі — сынам Арцёмам. Яшчэ да пачатку спаборніцтва Зміцер так і заявіў: “Я прыйшоў, каб паесці”. Паказальна, што, у адрозненне ад астатніх удзельнікаў, ён запіваў ежу выключна вадой, а не таматным сокам, півам, кока-колай ці іншымі напоямі.
Спачатку лідарам быў студэнт Уладзіслаў (куды ж без галодных студэнтаў!), але калі ўжо здавалася, што перамога — вось яна, сітуацыя кардынальна змянілася.
Іншы студэнт, Багдан, стаў удзельнікам у апошні момант. Ён атрымаў міні-перамогу ў хуткасным распіванні гарбаты і лепш за астатніх сказаў скорагаворку. Як гэта зранку хуценька пралапатаць: “В тундре утром выдры в гетрах тырят в ведрах ядра кедров”.
Каля 25 хвілін спатрэбілася Змітру, каб знішчыць паўтаракілаграмовы сэндвіч (класічны багет з вяндлінай, сырам, свежай гароднінай, смачна запраўлены кетчупам, маянэзам або халапенья).
Публіка (пераважна моладзь) дружна скандавала “Давай!”
Сумна, але падчас мерапрыемства ніхто не згадаў пра небяспеку, якая падпільноўвае ўладальнікаў вялікіх страўнікаў. Штогод на такіх конкурсах, якія праводзяцца па ўсім свеце, здараюцца эксцэсы.
Наогул свет забаўляецца такімі відовішчамі ўжо амаль стагоддзе. Адным з першых конкурсаў, праведзеных на хуткае паглынанне, лічыцца чэмпіянат па паяданні хот-догаў, які праводзіцца з 1916 года ў гонар Дня незалежнасці Амерыкі.
Арганізатары паабяцалі, што цягам года абавязкова адбудзецца конкурс па паглынанні піцы, а пасля збору новага ўраджаю бульбы бульбашоў парадуюць відовішчам па паяданні дранікаў. Дарэчы, прызавы фонд збіраюцца павялічыць да 2 мільёнаў рублёў. “Вы ясце — мы плацім” — такі дэвіз мерапрыемства. А рызыкаваць сваім здароўем ці не, кожны вырашае сам.
Зарына Кандрацьева
