Мода на лядовыя фігуры дайшла да Беларусі. Тыя, хто не спалохаўся суботняга марозу і наведаў Цэнтральны батанічны сад, былі прыемна здзіўленыя, убачыўшы арт-аб’екты, што стварылі за два дні дванаццаць каманд — удзельніц першага ў Беларусі конкурсу снежна-лядовых фігур.
Акрамя прафесійных скульптараў у конкурсе ўзялі ўдзел студэнты Акадэміі мастацтваў, навучэнцы мастацкіх каледжаў імя Глебава (5 каманд) і імя Ахрэмчыка.
- 3 месца – “Маманцяня”
Як адзначыла загадчыца інфармацыйна-асветніцкага сектара Алена Сакурэнка, “ідэя правядзення фестывалю прыйшла яшчэ ў мінулым годзе, але тады яе ажыццявіць не ўдалося. Вырашылі зрабіць у гэтым”.
- 2 месца – “Успамін”
Мастакам былі выдзеленыя гурбы спрасаванага снегу і неабходны інструмент (рыдлёўкі, шпатэлі, сякеркі, стамескі — усё, што падыходзіла для колкі, счэсвання і шліфоўкі матэрыялу), астатняе залежала ад фантазіі і майстэрства аўтараў.
На кляновай алеі размясціліся казачныя і міфалагічныя персанажы: ад хаткі на курыных ножках, цуда-юда рыбы кіта, чарапахі да старажытнагрэцкага Атланта, што трымае буйны горад на плячах. Можна пабачыць як жывёлінаў, што існавалі ў дагістарычныя часы (маманцяня), так і прадметы нашай рэчаіснасці (кампутар, кубік Рубіка).
- 1 месца – “Зімовая размова”
Хоць гэта не тыя празрыстыя лядовыя фігуры, рэпартажы пра якія можна ўбачыць з іншых краін (больш дарагая тэхналогія), але гледачам было чаму дзівіцца: кавалачкі ледзяшоў выкарыстаныя ў якасці іракеза (у “Партрэце панка Сідарава”), ігліца і садавіна, замерзлыя ў лёдзе, — у “Маманцяняці” і “Успамінах”. Фантазіі аўтараў не было межаў.
Паміж камандамі разыгралася сапраўдная барацьба. Нягледзячы на розны ўзровень падрыхтоўкі, усе атрымалі асалоду ад працэсу стварэння (недаўгавечных, да першай адлігі) скульптурных кампазіцый, для іншых гэта стала сапраўдным трэнінгам і магчымасцю праявіць свой талент, а для наведнікаў — іскрыстым на сонцы відовішчам.
“Ой, складана! Мы і піламі, і рыдлёўкамі, і сякерамі працавалі. Мы і не ўяўлялі, што настолькі складана будзе: што зробіш, упершыню працавалі са снегам. Але галоўнае — не перамога, а тое, што нам удалося паспрабаваць свае сілы”, — падзяліліся ўражаннем першакурсніцы з гімназіі-каледжа мастацтваў імя Ахрэмчыка.
Першае месца і галоўны прыз конкурсу — ноўтбук — атрымала кампазіцыя “Зімовая размова”, што запрашае наблізіць надыход вясны цяплом целаў і загавораў. Другое месца дасталася кампазіцыі “Успамін”, дзе жаночы вобраз лунае ў аблоках і згадвае прыгожае. Трэцяе месца і прыз глядацкіх сімпатый аддалі “Маманцяняці”, якое шукае цяпло і ўжо адчула вясну.
Дзятве было дзе пагойсаць, бацькам — пафатаграфаваць. Зазірнула на свята і вяселле.
Дарэчным стаў пачастунак, падрыхтаваны арганізатарамі, — гарбата з травамі, якія вырошчваюцца на тэрыторыі Батанічнага саду, была запараная спецыяльна каб сагрэць наведвальнікаў. А каб яна не прастыла на марозе, узялі ў вайсковай частцы тэрмасы. Пачаставацца карысным напоем маглі ўсе ахвотныя.
Акрамя таго, толькі ў гэты дзень тут можна было ўзяць лыжы напракат і праехацца падрыхтаванай лыжнёй па маляўнічых месцах Батанічнага саду.
Зарына Кандрацьева
