Супольны прадукт мінскай турыстычнай агенцыі “Кола падарожжаў” і тэатра “Берсерк” – экскурсія пад назвай «Шляхецкi радавод», што праходзіць праз Заслаўе, Ракаў і Івянец, – прапануецца ад нядаўняга часу аматарам мінуўшчыны Беларусі і яе замежным гасцям. У праграме – наведванне гісторыка-культурных мясцінаў, знаёмства з беларускай гісторыяй на прыкладзе выдуманага беларускага роду Яновічаў, майстар-класы па сярэднявечным фехтаванні, коннай выездцы, знаёмства з вядомым філосафам і дударом Тодарам Кашкурэвічам ды многае іншае.
Неакадэмічная форма падачы гістарычнага матэрыялу экскурсавода Яўгена Апанасевіча цягам праграмы час ад часу ўплятаецца ў інсцэніраваную гісторыю выдуманага беларускага роду Яновічаў. Экскурсія ператвараецца ў сапраўднае шоў! На прыкладзе вырашэнняў, што прымаюцца персанажамі пастановы, паказваецца і тлумачыцца стан беларускай шляхты на пэўным гістарычным адрэзку. Наведвальнікам экскурсіі прапануецца не толькі назіраць за дзеяннем, але і павучыцца спраўляцца са старажытнай зброяй і прыняць пэўны ўдзел у самім спектаклі. Дзеянне адбываецца пад сярэдневечныя мелодыі.
Музыка і культуролаг Тодар Кашкурэвіч знаёміць гасцей з сапраўдным беларускім нацыянальным інструментам – беларускай дудой. Распавядае гісторыю і прынцып дзеяння інструмента, даводзіць яго аўтэнтычнасць і, вядома, паказвае ў дзеянні.
Музей і майстэрні Івянца дэманструюць удзельнікам экскурсіі магчымасці дрэваапрацоўчых, ганчарных, ткацкіх і кавальскіх рамёстваў.
У фінале экскурсіі гасцям прапануецца пакаштаваць нацыянальныя стравы і напоі.
