Калі вы раптам яшчэ не вызначыліся, як цікава і з карысцю правесці выходныя, мы падкажам. Экскурсіі, выставы, тэатральны фэст, супольныя танцы ды кінапрагляды, канцэрты беларуских музыкаў — выбірайце мерапрыемствы ў сваім горадзе і на свой густ!
Анлайн-канферэнцыя «Беларуская нацыя вачыма дыяспары і суайчыннікаў»
У суботу, 12 лістапада, Беларускі Інстытут Навукі і Мастацва ў Канадзе і часопіс «Культура. Нацыя» ладзяць анлайн-канферэнцыю «Беларуская нацыя вачыма дыяспары і суайчыннікаў».
У праграме — найцікавейшыя ды дужа актуальныя даклады навукоўцаў, літаратараў і грамадскіх дзеячоў з Беларусі, Польшчы, Канады і Бразіліі. А яшчэ будзе круглы стол з трапнай назвай «Што рабіць». Дата: 12 лістапада
Час: з 11.00 (час атаўскі, гэта 18.00 па Мінску)
Месца: zoom
Удзел бясплатны. Вывучайце праграму па спасылцы ды далучайцеся праз зум-спасылку ў ёй.
Мінск
Выстава «Шляхамі Скарыны»
У галерэі «Арт-Беларусь» праходзіць выстава «Шляхамі Скарыны».
Прымеркаваная яна да 500-годдзя выдання «Малой падарожнай кніжкі» Францыска Скарыны, экзэмпляр якой знаходзіцца ў карпаратыўнай калекцыі ААТ «Белгазпрамбанк». Апроч гэтага, можна пабачыць факсіміле ўсіх гравюр Францыска Скарыны з іншых яго выданняў — 38 маштабных ілюстрацый, падрыхтаваных да друку Канстанцінам Вашчанкам і Аляксандрам Зінкевічам.
Падрабязней пра выставу тут.
Гродна
Экскурсія «Рэквіем па страчаных лёсах»
У суботу, 12 лістапада, музей гісторыі рэлігіі запрашае на няпросты, але ж важны і цікавы шпацыр «Рэквіем па страчаных лёсах».
Пачатак у 11:00.
Шпацыр пройдзе мясцінамі колішняга гарадзенскага гета ад вуліцы Замкавай да Слабодкі.
Вы даведаецеся пра жыццё гарадзенскага гета, пра трагічныя лёсы вязняў, пачуеце гісторыі супраціву.
Як запісацца, глядзіце тут.
Гомель
Супольны прагляд беларускага мультфільма «Прыгоды Несцеркі»
У суботу, 12 лістапада, філіял Веткаўскага музея запрашае ўсіх маленькіх мультфільмаманаў і іх бацькоў у кінаклуб «ЭТНАфільМЫ» на супольны прагляд поўнаметражнага беларускага мультфільма «Прыгоды Несцеркі» пад гарбатку ды размовы.
Падрабязнасці тут
Полацк
Тэатральны фэст «УMOЎNO»
Будзеце ў Полацку — завітайце ў мясцовы палац культуры. Тут у пятніцу, 11 лістапада, пачынаецца тэатральны фэст «УMOЎNO», на якім можна пабачыць пластычныя спектаклі тэатраў з Віцебска, Мінска, Полацка.
У праграме ёсць файныя цікавосткі, напрыклад, спектакль «Кандзінскі. Без косак» ці перформанс «Дыхаць».
Падрабязны расклад глядзіце на сайце фэста па спасылцы. І завітвайце!
Фэст доўжыцца да 13 лістапада.
Варшава
Спектакль «3@.мова»
11 і 12 лістапада, у пятніцу і суботу, беларускі «TeamТэатр» грае ў Варшаве новы спектакль «3@.мова», паводле старажытных песень і рытуалаў Палесся.
«3@.мова» — гэта спроба адрадзіць архаічныя традыцыі i надаць ім якасці сучаснай лічбавай эпохі.
Падрабязнасці тут.
Беласток
Выстава «Пра рак. Гісторыі беларусак»
Гераінямі фотавыставы сталі тры беларускі, якія зараз у вымушанай эміграцыі і праходзяць лячэнне ад раку малочнай залозы. Гэта Каця Пытлева, Каця Ваданосава і Лена.
Партрэты Кацярыны Ваданосавай у праекце «Пра рак. Гісторыі беларусак»
Дата: 12 лістапада
Час: з 18:30 да 19:30
Месца: MediaPortBelarus у Беластоку (Sienkiewicza 44, Białystok)
Вільня
Кацэрт «J:Mors»
13 лістапада, у нядзелю, гурт «J:Mors» едзе ў Вільню з канцэртам!
У лістападзе гурт адзначае свой дзень нараджэння, а таму не абыдзецца без сюрпрызаў і новых песень.
Прыйшоў час сустрэцца, абняцца і заспяваць разам!
Квіткі коштам 17 еўра можна набыць па спасылцы.
Дата: 13 лістапада
Час: 19.00 (час мясцовы)
Месца: Paviljonas, Pylimo gatvė, Вільня
Тбілісі
Беларускі батлеечны спектакль
У нядзелю, 13 лістапада, акцёр Аляксандр Ждановіч, таксама любімы намі як Маляваныч, запрашае беларусаў Тбілісі паглядзець батлеечны спектакль «Цар Ірад».
Падрабязнасці тут
Лондан
Канцэрт гурта «Ляпіс Трубяцкі»
13 лістапада, Сяргей Міхалок і «Ляпіс Трубяцкі» граюць драйвовы канцэрт у Лондане.
Дата: 13 лістапада
Час: 19.00 (час мясцовы)
Месца: клуб «Scala», 275 Pentonville Road, Лондан
Квіткі коштам ад 50 фунтаў можна набыць па спасылцы.
Больш беларускіх падзеяў шукайце ў нашай Афішы.
Калі сярод прапанаваных варыянтаў не знайшлося нічога па душы, раім выправіцца ў вандроўку па Беларусі. Скласці цікавы маршрут дапаможа наша рубрыка «Вандруем разам». Вось, да пракладу, некалькі магчымых варыянтаў, куды варта з’ездзіць і што паглядзець:
Вандруем разам з «Будзьма!». Што паглядзець у Аршанскім раёне
7 цудаў Лунінеччыны
7 цудаў Шаркаўшчыны: гайд ад «Будзьма!»
Каб не прапусціць нічога цікавага, раім падпісацца на адмысловы тэлеграм-бот «Будзьма разам!», які дапамагае падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!
Карыстацца ім вельмі проста: выбірайце той ці іншы горад або ўсю краіну, падпісвайцеся асобна на ўсе анлайн-мерапрыемствы ці выбірайце варыянт all inclusive — усе беларускія падзеі свету (у тым ліку і анлайн-мерапрыемствы). А пасля — сачыце за беларускім дзвіжам і далучайцеся!
А па гэтай спасылцы можна знайсці афішу бясплатных мерапрыемстваў.
