10 лістапада ў Барысаве ў рэсурсным цэнтры моладзевых ініцыятыў “Ступени” ў межах праекта "Маё права" была праведзеная сустрэча-дыскусія для падлеткаў на тэму “Лічбавы след маладога спецыяліста”. Пра паспяховае фарміраванне прафесійнай рэпутацыі ў інтэрнэце і сакрэты падбору персаналу з юнакамі і дзяўчатамі ва ўзросце ад 10 да 17 гадоў пагутарыла Валянціна Чэкан – педагог з 25-гадовым стажам, прадпрымальніца, сузаснавальніца IT Princess Academy і прыватнай школы Steam.
Валянціна Чэкан
Асабістыя звесткі ў сеціве – ілюзія кантролю
Ці часта мы, посцячы ў інстаграме сэлфі, фотачкі з коцікамі ды ежай або робячы стрымы з вясёлых вечарынак, задумваемся пра тое, наколькі шырока пойдзе гэтая інфармацыя і ці зможа нехта выкарыстаць яе супраць нас? Наколькі мы кантралюем распаўсюд усяго таго кантэнту, які публікуем у сеціве?
Пастаўленыя лектаркай Валянцінай Чэкан пытанні спачатку выклікалі адназначную рэакцыю слухачоў-падлеткаў. Практычна ўсе адказалі: “Канечне, я ведаю, дзе, калі і што пра мяне друкуецца ў сацсетках! Сябры мяне тэгаюць, а на ўласнай старонцы я сам (а) выбіраю, адкрываць або закрываць свой кантэнт. А тое, што пазначаю сваё месцазнаходжанне – дык магу і не пазначаць!”
На прыкладзе таго, якім доўгім шляхам звычайнае паведамленне ў мэсэнджары ідзе, каб трапіць ад аднаго чалавека да іншага, спікер паказала, што ўсё не так проста. Праз ролевую гульню падлеткі змаглі пераканацца, што нашы фота, лайкі, каменты, рэпосты, падпіскі і г. д. пакідаюць лічбавы след, асядаюць у інфармацыйным полі інтэрнэту на розных серверах. Спадарожнікі, вышкі мабільнай сувязі і правайдары фіксуюць літаральна ўсё – і нічога не выдаляецца! Інтэрнэт жа бязмежны і беспамерны! Юнакі і дзяўчаты, якія раней не задумваліся пра гэта, засталіся ўражаныя.
Аднак баяцца таго, што канфідэнцыйнасць асабістай інфармацыі будзе парушаная, не варта – нікому няма справы да “простых смяротных” грамадзян планеты Зямля. Хіба толькі калі чалавек уяўляе сваімі дзеяннямі пагрозу для жыцця іншых, займаецца тэрарызмам, гандлем зброяй або наркотыкамі, яго асабістая інфармацыя можа быць перададзеная адпаведным службам.
Усё ж мае сэнс задумвацца, што, калі і навошта мы посцім, падсумавала Валянціна Чэкан.
Чытайце таксама: «Не пакідай слядоў….»
Хітрыкі маркетынгу і “шалёныя” інтэрнэт-продажы
У момант, калі мы праводзім пальцам па экране смартфона, адмысловыя інтэрнэт-інструменты фіксуюць, на чым канкрэтна затрымалася наша ўвага найдаўжэй. Кожны ведае: варта ўсяго толькі адзін раз загугліць “купіць чырвоную сукенку ў Мінску” або “як пакласці паркет”, кожны дзень цягам двух-трох тыдняў нам будзе вылазіць кантэкстная рэклама, нагадваючы пра ўсе сукенкі і ўсе паркеты на свеце.
Новыя тэхналогіі адкрываюць шырокія магчымасці для маркетынгавых даследаванняў. Напрыклад, калі на сайце моднага адзення больш за ўсё карыстальнікі клікаюць 46 або 48 памер – прадпрымальнік ведае, якую колькасць тавараў якога памеру можна паспяхова прадаць. Спецыяльныя праграмы-аналізатары здольныя расказаць вельмі многае пра патэнцыйных пакупнікоў: іх пол, узрост, геаграфічную лакацыю, сямейны стан, якія пакупкі і ў якіх крамах яны робяць, якія прадукты і тавары купляюць найчасцей. На аснове сабраных дадзеных і выбудоўваецца стратэгія паспяховых продажаў.
І гэта ўсё таму, што мы штодзённа і безаглядна пакідаем лічбавыя сляды.
Працадаўца і спашукальнік – рэпутацыя ды інтэрнэт
З 8-гадзіннага рабочага дня ў офісе чалавек рэальна працуе 5 з паловай, астатні час ён сёрфіць у інтэрнэце – і ўсе кіраўнікі пра гэта ведаюць, дзеліцца сваім досведам наймальніка Валянціна Чэкан. Калі падначалены посціць фота ў інстаграме падчас рабочых гадзін, гэта характарызуе яго як безадказнага і ненадзейнага. Праз актыўнасць у сацсетках можна лёгка прасачыць за распарадкам дня і ладам жыцця супрацоўніка і зрабіць адпаведныя вывады. Таму будзьце пільныя, інстаграмшчыкі, за вамі можа назіраць ваш бос!
У цяперашні час 72 % людзей шукаюць і знаходзяць працу ў сацыяльных сетках, таму самапрэзентацыя надзвычай важная. Фактычна кожны працадаўца наведвае асабістыя інтэрнэт-старонкі спашукальніка. Ацэньваюцца: інфармацыя ў профілі, фотаздымак профіля, змест і частата размяшчэння допісаў, а таксама кола знаёмстваў.
Выдатна, калі вы архітэктар і ў вашым блогу ёсць допісы на адпаведную тэматыку, якія паказваюць вашу кампетэнтнасць і крэатыўнасць. Асабліва эфектна можа развіць сваю старонку дызайнер, фатограф і прадстаўнік любой іншай прафесіі, вынікі дзейнасці якой можна паказаць візуальна. Не вельмі добра, калі на старонцы зашмат фотак, датычных штодзённага побыту, неабавязковага для вынясення на публіку.
Для стварэння станоўчага іміджу рэкамендуецца таксама падзяляць сацыяльныя сеткі на асабістыя і прафесійныя, фільтраваць патэнцыйных падпісчыкаў і чытачоў (допісы для бацькоў, для сяброў, для калег, для шырокай публікі і г. д.).
Першы крок да фарміравання сваёй прафесійнай рэпутацыі можна зрабіць проста цяпер. Прагугліце сябе, праверце свае налады канфідэнцыйнасці, абнавіце фотаздымкі ў сваім профілі, ацаніце, які вобраз вы ствараеце ў сацыяльных сетках.
Тэкст і фота: Віка Трэнас, budzma.by
Сачыце за нашымі публікацыямі ў Telegram, Facebook, Вконтакте ды Twitter! А ў нашым Instagram вас чакаюць яскравыя фота!
