Першая ў Мінску выстава вулічных інсталяцый “Арт-астравы” адкрылася на востраве Камсамольцаў. Пад адкрытым небам прадстаўленыя інсталяцыі Канстанціна Селіханава, Канстанціна Касцючэнкі, Міхаіла Шыкава, Паўла Вайніцкага, Валерыя Малахава, Вадзіма Мацкевіча, Ігара Лявонцьева, Дзяніса Барсукова, Таццяны Гомзы, Пятра Кузміча і Віктара Астэра.
Адкрыццё “астравоў” атрымалася мабільным і абсалютна ў фармаце месца — веласіпедысты спыняліся, каб зрабіць сэлфі на фоне велізарнай чырвонай прышчэпкі Ігара Лявонцьева, дзеці караскаліся на гіганцкае сырнае крэсла Дзяніса Барсукова, мамы з каляскамі шпацыравалі па алеі ўздоўж двух катоў у гумовых ботах, і, вядома, кожны хацеў зазірнуць, што там унутры старых вулляў. Каля інсталяцыі пра пяць капеек нехта расказваў, што менавіта такімі манетамі 1962 года выпуску ў савецкія часы можна было вылечыць сінякі на скуры.
Па словах дырэктара Цэнтра сучасных мастацтваў Наталлі Шаранговіч, спачатку з’явілася назва праекта, і калі арганізатары пачалі выбіраць месца, вырашылі, што самае зручнае для такога праекта — гэта Камсамольскае возера з больш чым дзесяццю астравамі на ім. У выніку спыніліся на востраве Камсамольцаў, дзе ёсць пешаходная зона.
Таццяна Гомза, мастачка, дызайнер, працуе ў тэхніцы трэш-арт:
“Мінску вельмі бракуе сучасных аб’ектаў у гарадскім і паркавым асяроддзі — дзіўных, вясёлых, якія прымушаюць спрачацца і абмяркоўваць. «Арт-астравы» — добры прыклад такога вулічнага мастацтва, і, спадзяюся, гэта не апошні эксперымент. Праект нагадвае летні пленэр, падчас якога мастакам далі свабоду ў выбары форм і матэрыялаў. Удзельнікі падышлі да працэсу па-рознаму — нехта працаваў у майстэрні, а нехта канчаткова вырашаў, што і як будзе выглядаць, проста падчас мантажу.
Цэнтральныя фігуры маёй інсталяцыі “Рыбны дзень” — два каты-рыбакі. Прататыпам паслужыла невялікая па памерах выставачная праца з такой жа назвай, якую вельмі палюбілі наведнікі розных выставаў. Калі даведалася пра месца праекта, адразу зразумела: катам-рыбакам на беразе ракі самае месца. Коцікі вельмі ўмоўныя па стылістыцы, але пры гэтым маюць усё неабходнае для рыбалкі. Гэта мая першая праца ў стылі трэш-арт менавіта ў такім вялікім фармаце, вышыня кампазіцыі — каля 4-х метраў, і працаваць было сапраўды вельмі цікава”.
Павел Вайніцкі, скульптар:
“Я вельмі рады, што такі праект адбыўся ў Мінску, — гэта пазітыўны прэцэдэнт супрацоўніцтва бізнесу і мастацтва. І далей такіх праектаў будзе больш, гэта непазбежна. Для астравоў я зрабіў “Вавілонскую вежу” — інсталяцыю, дзе выкарыстаныя старыя пчаліныя вуллі, вывезеныя з экспедыцыі па беларуска-літоўскім памежжы. Аб’екты былі сабраныя ў палях і вёсках. «Вавілонскую вежу» з вулляў можна інтэрпрэтаваць па-рознаму, але для мяне гэта перш за ўсё настальгічная метафара, спроба сродкамі мастацтва пераадолець непазбежныя падзел і энтрапію”.
“Арт-астравы” будуць працаваць усё лета, наведаць іх можна абсалютна бясплатна. Арганізатары выставы — Нацыянальны цэнтр сучасных мастацтваў, Міністэрства культуры і Мінгарвыканкам — разлічваюць, што за тры месяцы экспазіцыю ўбачыць не менш за мільён гледачоў.
Генеральны партнёр праекта — ЗАТ «Альфа-Банк».
Кася Кірпацік
Фота: Зарына Кандрацьева