Калі вы раптам яшчэ не вызначыліся, як цікава і з карысцю правесці выходныя, мы падкажам. Васільковы пленэр у музеі-дачы Васіля Быкава, святкаванне Купалля ў розных гарадах свету, гарадскі пікнік Vulitsa Ezha ў Мінску, фэст гістарычнай рэканструкцыі «Плоская гара» ў Віцебску, кава з Уладзімірам Арловым і Яраславам Іванюком у Гданьску, экскурсія да месца жыхарства Быкава ў Франкфурце, канцэрты, выставы, спектаклі — выбірайце падзеі ў сваім горадзе і на свой густ.
Беларусь
Мінск і Мінская вобласць
Васільковы пленэр у музеі-дачы Васіля Быкава пад Мінскам
У суботу, 22 чэрвеня, у музеі-лецішчы Васіля Быкава зноў ладзяць мастацкі васільковы пленэр!
Прапануюць роспіс торбаў у стылі і тэхніцы беларускіх маляванак пад шатамі славутых быкаўскіх бяроз.
Вас чакае:
экскурсія па музеі,
цікавы лекторый пра пісьменніка,
майстар-клас роспісе сумак-шопераў у стылі беларускай маляванкі, які правядзе новая гаспадыня музея Ірына Князева.
Майстар-клас будзе на вольным паветры, у двары быкаўскага лецішча, пад шатамі славутых «быкаўскіх» бяроз.
Гарадскі пікнік Vulitsa Ezha ў Мінску
22 і 23 чэрвеня ў мінскім батанічным садзе пройдзе гарадскі пікнік Vulitsa Ezha. Два дні любімых страў, новых густаў, добрай музыкі, экалагічнага шопінгу, забаў і сустрэч.
Будзе ўсё як мае быць: 40+ удзельнікаў, 200+ страў і напояў, Local Food Market з фермерскай экапрадукцыяй і хатнімі прысмакамі, дызайнерскі маркет з арыгінальнымі штучкамі ад рамеснікаў, кінатэатр на вольным паветры, фотазона, дзіцячая зона і прастора для мам, актыўнасці і забаўкі, музыка і квізы і гэтак далей, і гэтак далей.
У гэтым сезоне на фестываль вернецца жывая музыка, дададуцца танцавальныя спаборніцтвы на галоўнай сцэне, і прапануюць не толькі есці смачнюхі, але і вучыцца гатаваць.
Купалле ў Азярцы
У суботу, 22 чэрвеня, у музеі народнай архітэктуры і побыту ў Азярцы святкуюць Купалле.
Вас чакае:
Пляценне вянкоў;
Купальскае шэсце з традыцыйнымі песнямі;
Вогнішча: карагоды, гульні, скокі;
Варожбы на вянках і зеляніне;
Чарадзейныя казкі;
Майстар-клас па вывучэнні купальскіх песень;
Майстар-клас па традыцыйным танцам пад беларускія народныя інструменты;
Майстар-клас па дэкоры з травы;
Майстар-клас па ляльках з травы;
Выступленні фальклорных калектываў.
Купалле ў Дукорскім маёнтку
22 чэрвеня Дукорскі маёнтак запрашае аб’яднацца са старадаўнімі традыцыямі продкаў, каб сустрэць купальскую ноч.
Набліжаецца самая чароўная беларуская ноч, калі ўсё магчыма: адшукаць папараць-кветку і стаць усемагутным, сустрэць водных і лясных пачвар, зразумець гутаркі птушак і дрэў, ачысціцца агнём і ранішняй расой.
Вогнішча, карагоды, вянкі, зёлкі, варожбы, гульні, падарункі — за гэта можаце не хвалявацца. Збірайце сяброў, пакуль мы рыхтуем сюрпрызы для вас.
Віцебск
Фэст гістарычнай рэканструкцыі «Плоская гара» ў Віцебску
Гэтымі выходнымі, 22 і 23 чэрвеня, у ВІцебску пройдзе фэст гістарычнай рэканструкцыі «Плоская гара».
У праграме:
арбалетны і лучны турнір
сярэднявечныя спаборніцтвы
танцы
фаер-шоў
кірмаш
ды шмат чаго іншага.
Германія
Франкфурт-на-Майне
«Па слядах Быкава», экскурсія да месца жыхарства Быкава ў Франкфурце
22 чэрвеня адбудзецца экскурсія да месца жыхарства Быкава ў Франкфурце «Па слядах Быкава».
З 2001 па 2002, Васіль Быкаў жыў у Франкфурце. Тут ён піша «Цярновы шлях» і пачынае «Доўгую дарогу дадому». Падчас экскурсіі можна будзе падрабязна даведацца пра жыццё Быкава ў эміграцыі і прайсці па Франкфурце яго слядамі.
Брэмен
Купалле ў Брэмене
У суботу, 22 чэрвеня, беларусы Брэмена святкуюць Купалле.
Вас чакае музыкальна-забаўляльная праграма на прыродзе, майстар-класы і сумесны пікнік.
ЗША
Вашынгтон
Купалле ў Вашынгтоне
У суботу, 22 чэрвеня, беларусы Вашынгтона святкуюць Купалле і клічуць далучацца!
Будзе дзве часткі:
Апоўдні пачнецца вялікі сяброўскі пікнік са знаёмствамі, сяброўскімі размовамі, пачастункамі, гульнямі і рознымі іншымі прыемнасцямі. Кожны можа прынесці штосьці сваё да агульнага стала.
А 17-й жа пачнуць святкаваць уласна Купалле.
У праграме:
пляценне купальскіх вянкоў
музыка і песні
танцы і карагоды
конкурсы і гульні (магчыма нават пошук Папараць-кветкі! )
Купальскае вогнішча
Польшча
Варшава
Агульнабеларускі купальскі пікнік у Варшаве
У суботу, 22 чэрвеня, прастора «Робім разам» запрашае на агульнабеларускі купальскі пікнік.
Будуць і традыцыйныя купальскія спевы, танцы і вогнішча, забавы і інтэрактывы для дзетак і дарослых.
Будуць шмат спяваць, танчыць, стасавацца, смачна есці, весела і карысна бавіць час.
Гданьск
Кава з Уладзімірам Арловым і Яраславам Іванюком у Гданьску
У суботу, 22 чэрвеня, беларусаў Гданьска запрашаюць на цёплую і ўтульную сустрэчу з Уладзімірам Арловым і Яраславам Іванюком з фонду kamunikat.
Спадар Уладзімір падзеліцца асабістымі развагамі праз прызму іранічных эсэ. Прагучаць вершы з новай кнігі ў выкананні аўтара і адбудзецца шчырая бяседа пра літаратуру і гісторыю.
Спадар Яраслаў распавядзе пра планы і навіны выдавецтва kamunikat.org, а таксама зладзіць кніжны кірмаш, дзе прэзентуе найноўшае выданне Васіля Быкава з аповесцямі «Бліндаж» і «Афганец».
Чэхія
Прага
Купалле ў Празе
У суботу, 22 чэрвеня, суполка «Пагоня» і Беларускае танцавальнае таварыства ў Празе сардэчна запрашаюць беларусаў Чэхіі адсвяткаваць Купалле!
Праграма святкавання:
19:00 — 20:00 — збор кветак ды пляценне вянкоў, нарыхтоўка дроў для вогнішча;
20:00 — 21:00 — беларускія народныя гульні і танцы;
ад 21:30 — распальванне купальскага вогнішча, спевы ў карагодзе, гульні і вольныя забавы.
Далучайцеся!
Больш беларускіх падзей шукайце ў нашай АФІШЫ.
Калі сярод прапанаваных варыянтаў не знайшлося нічога па душы, раім выправіцца ў вандроўку па Беларусі. Скласці цікавы маршрут дапаможа наша рубрыка «Вандруем разам».
Каб не прапусціць нічога цікавага, раім падпісацца на адмысловы тэлеграм-бот «Будзьма разам!», які дапамагае падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!
А па гэтай спасылцы можна знайсці афішу бясплатных мерапрыемстваў.
