Калі вы раптам яшчэ не вызначыліся, як цікава і з карысцю правесці выходныя, мы падкажам. Восень у Завоссі, свята ў Залессі, Super Besse ў Варшаве, а Intelligency ў Празе — выбірайце падзеі ў сваім горадзе і на свой густ!
Беларусь
Мінск і Мінская вобласць
У суботу, 23 верасня, у Музеі народнай архітэктуры і побыту ў Азярцы святкуюць Багач.
Багач — свята, якое заканчвала цыкл вырошчвання ўраджаю і было прымеркавана да дня восеньскага раўнадзенства. Як казалі ў народзе: «Багач заткнуў у страху рагач». Уся праца пераносілася на падворак, у гумно, ёўню, млын.
Вас чакае:
- Расповед аб традыцыях свята «Багач»;
- Урачысты абыход вёскі;
- Майстар-клас па малацьбе снапоў і правейванні зерня, а таксама дэманстрацыя працы малатарні;
- Фальклорная праграма;
- Традыцыйныя гульні і танцы.
23 верасня Дукорскі маёнтак запрашае на свята Багач. Тут можна стаць удзельнікам абраду «Багач», паўдзельнічаць у майстар-класах па танцах, пазнаёміцца з традыцыйнымі рамёствамі, паслухаць музыкаў, пачаставацца беларускімі стравамі!
Восеньскі фэст «Багач» у Вязынцы
У нядзелю, 24 верасня, у Вязынцы святкуюць Багач са Студэнцкім этнаграфічным таварыствам!
У праграме:
- урачысты абрад ссыпання зерня і запальвання вагню,
- дажынкавыя і восеньскія спевы з розных рэгіёнаў Беларусі,
- святочныя пачастункі — хатні хлеб і мёд, хатні сыр,
- майстар-класы па рамёствах,
- кухня і кірмаш,
- а пад вечар — традыцыйныя танцы!
Брэсцкая вобласць
Фэст «Восень у Завоссі» пад Баранавічамі
У суботу, 23 верасня, у сядзібе Міцкевічаў у Завоссі пад Баранавічамі — літаратурна-музычны фестываль «Восень у Завоссі».
Гасцей фэсту чакаюць экскурсіі па сядзібе, канцэртная праграма, выступленні літаратараў, інтэрактыўныя пляцоўкі, выставы, квэсты, гульні, майстар-класы, фотазоны. Выступаць будуць Галіна Сакольнік, Святлена Немагай, капэля Алеся Лася, народны літаратурны тэатр «Жывое слова». Спецыяльны музычны госць — фолк-бэнд «Неруш».
Віцебская вобласць
Экалагічнае свята «Жураўлі і журавіны Мёрскага краю»
23 верасня ў Мёрах пройдзе штогадовае экалагічнае свята «Жураўлі і журавіны Мёрскага краю».
Штогадзіну будзе адыходзіць аўтобус на лакацыю, з якой можна паназіраць за грацыёзнымі птушкамі ў падзорную трубу. Акрамя таго ў праграме:
- Конкурс ансамбляў «Жураўліны звон»
- Майстар-класы
- Конкурс сельскіх падворкаў «Жураўліны кірмаш»
- Гульні для дзяцей
- «Жураўліная пошта
- Флэшмоб «Спяём гімн Ельні разам»
- Спартыўна-забаўляльная пляцоўка «Журавель-асілак»
- Продаж журавін, мёду, зёлак і мясцовых прысмакаў
Гродзенская вобласць
Свята «Вяртанне Паўночных Афін» у Залессі
У суботу, 23 верасня, у Залессі на Смаргоншчыне святкуюць народзіны слыннага гаспадара сядзібы Міхала Клеафаса Агінскага.
У праграме:
- імпрэза «Танцуем паланэз разам»;
- музычна-гістарычная гасцёўня;
- прэзентацыя «Дзённіка Амеліі»;
- выступ артыстаў Вялікага тэатра Беларусі;
- эпізоды з оперы «Невядомы партрэт» Алега Залётнева;
- тэатралізаваная экскурсія па сядзібе Агінскага.
Магілёўская вобласць
У суботу, 23 верасня, у палацы Булгакаў у Жылічах — Вераснёўскі фэст з нагоды 200-годдзя палаца!
Вас чакае выступленне рэканструктараў, майстар-класы, гістарычны квэст, пленэр мастакоў, музейная экспазіцыя «Па старонках гісторыі», кірмаш і многае іншае.
Польшча
Варшава
Лекцыя Кацярыны Ваданосавай «Беларускі народны строй. Ад пасталоў да наміткі» ў Варшаве
У суботу, 23 верасня, Кацярына Ваданосава, тэлевядоўца, спявачка ды майстрыня шыцця і вышыўкі, чытае ў Музеі Вольнай Беларусі лекцыю «Беларускі народны строй: ад пасталоў да наміткі».
Вы даведаецеся, чаму спадарыня Кацярына не любіць слова «вышыванка», з якой прычыны старшыні калгасаў забаранялі жанчынам насіць традыцыйнае адзенне, як еўрапейская мода адбівалася на гусце беларускіх вяскоўцаў, што такое пуплы, маршчэнне, «вядзьмедзь кучаравы», і для чаго кожнаму сучаснаму беларусу патрэбны ўласны строй.
У суботу, 23 верасня, мінскі пост-панк-гурт Super Besse грае канцэрт у Варшаве.
Летась гурт выпусціў альбом Tristesse. На канцэрце будуць песні з альбома і старыя-добрыя. Кампанію складуць варшавякі «MAGIC MOMENTS».
Беласток
У нядзелю, 24 верасня, беларусы Беластока святкуюць Багач!
Гэта старадаўняе свята ўраджаю, прымеркаванае да дня восеньскага раўнадзенства. Кожны дбайны гаспадар імкнуўся завяршыць уборку ўсіх сельскагаспадарчых культур з палёў і агародаў.
Адзін з самых урачыстых і кульмінацыйных момантаў свята — абыход двароў, накіраваны на дастатак і дабрабыт усёй сельскай грамады.
Прыходзьце як след адсвяткаваць ды патанчыць у асалоду беларускіх танцаў!
Гданьск
Канцэрт Таццяны Грыневіч-Матафонавай у Гданьску
У суботу, 23 верасня, у Гданьску грае ўтульны акустычны канцэрт Таццяна Грыневіч-Матафонава.
Будуць спевы, ды танцы, ды ўтульныя гутаркі — карацей, файны вечар у цёплым асяродку сваіх.
Кракаў
У нядзелю, 24 верасня, у Кракаў прыбываюць разам тры беларускія літаратары: Дзмітрый Строцаў, Наста Кудасава і Артур Камароўскі.
Вас чакае:
- прэзентацыя выдадзеных за апошнія гады ў эміграцыі кніг;
- жывая гутарка з запрошанымі гасцямі;
- мажлівасць набыць і падпісаць у аўтараў зборнікі.
Чэхія
Прага
23 верасня гурт «Intelligency» грае вялікі канцэрт у Празе!
Гурт Intelligency у 2020 годзе нашумеў трэкам August, які пакарыў сусветныя чарты. Але да глабальнай папулярнасці хлопцы прайшлі цярністы шлях з узлётамі і падзеннямі.
Пачыналі яны з выступаў на вуліцах Мінска, а першы ганарар у 500 еўра здаваўся нечым нерэальным. Сёння Intelligency працуе з лэйбламі Warner і Universal і збірае мільёны праслухоўванняў на стрымінгавых пляцоўках.
Больш беларускіх падзей шукайце ў нашай Афішы.
Калі сярод прапанаваных варыянтаў не знайшлося нічога па душы, раім выправіцца ў вандроўку па Беларусі. Скласці цікавы маршрут дапаможа наша рубрыка «Вандруем разам».
Каб не прапусціць нічога цікавага, раім падпісацца на адмысловы тэлеграм-бот «Будзьма разам!», які дапамагае падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!
А па гэтай спасылцы можна знайсці афішу бясплатных мерапрыемстваў.
