Некалькі тысяч чалавек наведалі ў гэтую суботу, 30 верасня, Дранік-фэст у Магілёве. Фестываль ужо некалькі гадоў праходзіць на этнахутары Зялёны гай і паспеў стаць своеасаблівай візітнай карткай горада. Тут не ірвуцца ў Кнігу рэкордаў Гінеса, спрабуючы спячы самы вялікі дранік або накарміць дранікамі як мага больш людзей. Дранік-фэст — гэта цудоўнае свята, дзе ўсё для людзей, такая маленькая Еўропа з магілёўскім каларытам.
Удзельнікі фестывалю дзеляцца на некалькі каманд і ўвесь дзень пякуць дранікі па сваіх уласных (часта сакрэтных) рэцэптах — усё, вядома, бясплатна. Чые дранікі смачнейшыя — той і перамагае, праўда, каманды ў асноўным ўдзельнічаюць не дзеля перамогі. Хтосьці дзярэ бульбу на буйной тарцы, хтосьці — на дробнай, адны дадаюць яйкі і цыбулю, іншыя — муку ці нават грэчку — i кожны упэўнены, што менавіта яго рэцэпт правільны. Пакаштаваць беларускі прысмак выстройваюцца вялізныя чэргі, часам дранікаў даводзіцца чакаць 20-30 хвілін! Але мяркуючы па тым, што папулярнасць фестывалю толькі расце, людзі ўпэўненыя, што яно таго вартае.
Негалосны фаварыт свята — каманда Магілёўскага дзяржаўнага ўніверсітэта харчавання. У чэргах шэпчуцца, што менавіта ў іх самыя смачныя дранікі.
— А i не дзіва, прафесіяналы ж. Напэўна, спецыяльна да фестывалю вывелі формулу ідэальных дранікаў у сябе ў лабараторыях, — жартуюць магілёўцы.
У гэтым годзе, прызнаюцца ў Цэнтры гарадскіх ініцыятыў, на Дранік-фэсце з’елі паўтоны бульбы (дарэчы, бульбачка свая, мясцовая, з Быхаўскага раёна)! Колькі гэта ў драніках — палічыць проста нерэальна. Порцыі, як правіла, невялікія — адна-дзве бульбяныя ладкi на чалавека, бо ахвочых вельмі шмат. Дарэчы, людзям на фэсце ёсць чым заняцца і апроч ежы: працавалі фотазоны, невялікі маркет мясцовых рамеснікаў, праходзілі майстар-класы, конкурсы і эстафеты для дзяцей, можна было пакатацца на восліку, сустрэцца з сябрамі, паслухаць жывую музыку, пакачацца ў гамаку ці проста паваляцца на траве — словам, выдатна правесці час.
— Я вось паўгадзіны ўжо стаю у чарзе, змерзла, нават пачала думаць, што лепш бы я гэтыя дранікі дома сама згатавала, але потым паглядзела, як дзецям тут хораша, якія людзі задаволеныя і шчаслівыя, і адразу пацяплела на душы. Ды і чарга мая падышла якраз — дранiчкi гарачанькiя паспелі, — прызнаецца магіляўчанка Таццяна. — Ёсць у нас у Беларусі яблычны спас, ёсць мядовы і арэхавы. А гэта хай будзе бульбяны.
Адно з новаўвядзенняў фестывалю ў гэтым годзе — прыз “Залатая тарка”. Яго ўручылі установе грамхарчу, якая, на думку магілёўцаў, гатуе і падае самыя смачныя дранікі ў горадзе — першае месца ў кавярні “Блиндажъ”, другое — у “Шпаркага лася”, а трэцяе — у “МКС”, аднак вы можаце з гэтым рэйтынгам не згаджацца і самастойна ажыццявіць дранічны пабкроўл па ўстановах горада, каб па свайму густу выбраць самы смачны дранік Магілёва.
Іра Тонева
Іна Мельнікава
Глядзіце таксама:
“Дранік-Фэст” у фота
