У такую спякоту чаму-небудзь больш каларыйнаму за фруктовы лёд арганізм кажа “арыведэрчы”. Але нягледзячы на такое злоснае надвор’е (+32, і гэта ўжо ўвечары) Гільдыя шэф-кухараў Беларусі рызыкнула запрасіць усіх гурманаў у РГЦ “Сілічы” на дранікі ў межах першага беларускага фестывалю бульбы.
Спякота хай трошкі, але перамагла. Ахвотных пачаставацца халяўнымі дранікамі сабралася не так і шмат — каля сотні. І ўсё ж чарга па бульбяныя аладкі, якія некалькі кухараў смажылі на санцапёку, была досыць доўгая: каб атрымаць сваю порцыю, трэба было чакаць з паўгадзіны, не менш.
Усе чакалі не толькі “хлеба”, але і відовішч. А дакладней прэзентацыі гіганцкага драніка. Арганізатары абяцалі адмысловы бульбяны пазл, які кухары збяруць з маленькіх блінкоў. Запланаваныя памеры — 5 метраў. Гэта не зусім рэкорд (дранік не будзе суцэльным — яго складуць з некалькіх частак), а больш весялуха. Але ўсё адно цікава, што там атрымаецца.
Пакуль сонца яшчэ канчаткова не расплавіла мозг, звяртаемся да старшыні Гільдыі шэф-кухараў Міхаіла Грыгорчыка па падрабязнасці.
— Колькі і якіх інгрэдыентаў пойдзе на стварэнне такога мегабліна?
— Мы падрыхтавалі паўтары тоны бульбы, 100 кілаграм цыбулі, 500 яек, 50 кілаграм мукі, каля 70 літраў алею. А яшчэ шмат-шмат памідораў, якімі гледачы ў канцы шоу могуць закідаць кухараў.
— Як вам якасць беларускай бульбы? Толькі шчыра!
— Ну, калі шчыра, то не вельмі. Насамрэч нават крыўдна. Амерыканскія селекцыянеры вывелі гатунак фіялетавай бульбы, італьянскія кухары прыдумляюць нейкія новыя віды пасты, а ў нас усяго толькі два гатункі бульбы і ўсё. Пры гэтым бульба лічыцца беларускім брэндам.
Чаму мы не можам быць больш крэатыўнымі ў гэтай справе? Маладая бульба з беларускіх палёў — гэта проста казка. Смачная! А вось уся астатняя — нават не хочацца казаць. І тут нават не селекцыянеры вінаватыя, а недасканаласць тэхналогій захоўвання бульбы. Бульбяную страву часцей за ўсё ратуе прафесійны кухар.
— А можна фірмовы сакрэт? Што трэба, каб прыгатаваць смачныя дранікі?
— 100 грам каньяку. Кухару. Унутр.
Бліны з бульбы — гэта класіка жанру. Кухар Аляксей Садоўскі свядома пайшоў на кулінарны эксперымент: прыгатаваў салодкія дранікі з батату, клубнічнай вады, мукі, інжыру. Гатовую страву аздобіў марозівам і дэкараваў морквай.
Кухар Павел Крычэўскі замясіў бульбяное цеста з… абрыкосамі. Усе кулінарныя шэдэўры можна было паспрабаваць, але толькі пасля ўдзелу ў конкурсах.
Пакуль кухары дасмажвалі апошнія кавалачкі гіганцкага драніка, на сцэне выступалі хлапцы з No comment band. Дзяўчаткі ў прыгожых сукенках з задавальненнем танчылі, Хтосьці ратаваўся ў цені з марозівам.
І вось — на патэльні скварчыць апошняя дэталька вялікага дранікавага пазла. Гіганцкі блін замяралі рулеткай — на жаль, да пяці метраў не дацягнулі 80 см. Але гледачы гатовыя былі ахвяраваць рэкорднымі памерамі — чакаць на такой спякоце ўжо не было сілаў.
Пачаліся фінальныя конкурсы. Першы — для тых, хто больш за ўсё назбірае бліноў у сваю талерку. Другі — хто больш за ўсё з’есць бліноў за вызначаны час. Пераможцам апошняга стаў хлапец, які за лічаныя хвіліны “знішчыў” больш за 10 бліноў (досыць вялікіх па памерах). Яму падаравалі патэльню, каб практыкаваўся дома. Астатнія ўдзельнікі і гледачы адправіліся ў цень — чакаць вечаровага барбекю. А каманда Budzma.org накіраваліся дадому — у ледзяны душ.
Кася Кірпацік
Фота: Зарына Кандрацьева
